လွေးဇွန်မိုး၊ မေလ ၄ ရက်၊ ကွတ်ခိုင်
တအာင်းတပ်မတော် ထိန်းချုပ်ထားတဲ့ ရှမ်းမြောက် ကွတ်ခိုင်မြို့ ရပ်ကွက်(၂)ရှိ တအာင်းစာပေနဲ့ ယဉ်ကျေးမှုခန်းမမှာ ဘာသာပေါင်းစုံ တွေ့ဆုံဆုတောင်းပွဲ ပြုလုပ်ခဲ့တယ်လို့ ဒေသခံတွေဆီက သိရပါတယ်။
ဆုတောင်းပွဲကို မနေ့ မေလ ၃ ရက်က ပြုလုပ်ခဲ့ပြီး နိုင်ငံရေးပဋိပက္ခတွေကြား မလိုလားအပ်တဲ့ ဘာသာရေးပဋိပက္ခ မဖြစ်စေဖို့နဲ့ ဒေသတွင်း စည်းလုံးချစ်ကြည်စွာ နေထိုင်သွားကြဖို့ ရည်ရွယ်ပြီး ပြုလုပ်ခဲ့တာလို့ ဒေသခံ အမျိုးသားတစ်ဦးက ပြောပါတယ်။
“မြန်မာ့ကပ်ဘေးအမျိုးမျိုးက ကျော်လွှားနိုင်ကြဖို့ ဆုတောင်းခဲ့ကြတယ်။ ကိုးကွယ်ရာ ဘာသာအလျောက် အချင်းချင်း လေးစားရိုင်းပင်းကူညီသွားကြဖို့နဲ့ ချစ်ကြည်လက်တွဲစွာ နေထိုင်သွားကြဖို့ ရည်ရွယ်ချက်ဖြင့် ကျင်းပခဲ့တာဖြစ်တယ်”
ဘာသာပေါင်းစုံ ဆုတောင်းပွဲကို ပထမဆုံးအကြိမ် ပြုလုပ်ခဲ့တာဖြစ်ပြီး ဗုဒ္ဓ၊ ခရစ်ယာန်၊ အစ္စလာမ်၊ ဟိန္ဒူ စတဲ့ဘာသာကြီး ၄ ခုက သက်ဆိုင်ရာခေါင်းဆောင်နဲ့ ဗမာ၊ ရှမ်း၊ ကချင်၊ တအာင်း၊ ဂေါ်ရခါး စတဲ့လူမျိုးအလိုက် စာပေနဲ့ယဉ်ကျေးမှုအဖွဲ့ တက်ရောက်ခဲ့ကြတယ်လို့ ဆိုပါတယ်။
