မိုင်းရူပ၊ ဇန်နဝါရီ ၂ ရက်၊ ဒီးမော့ဆို
ကရင်နီပြည် ဒီးမော့ဆိုအနောက်ခြမ်းရှိ စစ်ရှောင်တွေ နေထိုင်တဲ့နေရာမှာ စစ်ကောင်စီတပ်က နှစ်ရက်ဆက်တိုက် ဗုံးကြဲတိုက်ခိုက်ခဲ့ပါတယ်။
၂၀၂၄ ခုနှစ် ဒီဇင်ဘာ ၃၁ ရက် ည ၁၂ နာရီဝန်းကျင်မှာ ဒီးမော့ဆိုအနောက်ခြမ်းကို ဂျက်လေယာဥ်နဲ့ ၂ ကြိမ် ဗုံးကြဲတိုက်ခိုက်ခဲ့ပြီးနောက် မနေ့ နှစ်သစ်ကူးနေ့ ဇန်နဝါရီ ၁ ရက် ည ၅ နာရီခန့်မှာလည်း ဒီးမော့ဆိုအနောက်ခြမ်းကို ဂျက်လေယာဥ်နဲ့ သုံးကြိမ် ဗုံး ထပ်ကြဲခဲ့တာပဲ ဖြစ်ပါတယ်။
“သုံးခါ လာကြဲသွားတယ်။ ဘာမှ မရှိဘူး။ သူတို့ ကြဲချင်လို့ လာကြဲတာ။ ဘယ်သူမှလည်း အပြင်မထွက်ရဲကြဘူး။ အခုလည်း အသံ ပြန်ကြားနေရတယ်” လို့ ဗုံးကြဲတဲ့ နေရာအနီးမှာ ရှိနေတဲ့ ဒီးမော့ဆိုဒေသခံအမျိုးသမီးတစ်ဦးက ရွှေဖီမြေကို ပြောပါတယ်။
လေကြောင်း တိုက်ခိုက်မှုကြောင့် အသက် ၃၀ ကျော်အရွယ် အမျိုးသားတစ်ဦး ထိခိုက်ဒဏ်ရာရပြီး အသေးစိတ်ကိုတော့ ရွှေဖီမြေက ဆက်လက် စုံစမ်းနေဆဲ ဖြစ်ပါတယ်။
ပြီးခဲ့တဲ့ ဒီဇင်ဘာ ၃၁ ရက်မှာလည်း ကရင်နီပြည် လွိုင်ကော်မြို့နယ် အရှေ့ဘက်ခြမ်းရှိ ဆင်စခန်း စစ်ရှောင်စခန်းကို စစ်တပ်က ဗုံးကြဲတိုက်ခိုက်ခဲ့လို့ သားအမိ ၂ ဦး ပွဲချင်းပြီး သေဆုံးကာ ၂ ဦး ဒဏ်ရာ ရခဲ့ပါတယ်။
စစ်တပ်ဘက်ကတော့ ဒီးမော့ဆိုမြို့နယ်မှာ လေကြောင်း တိုက်ခိုက်ခဲ့တာနဲ့ ပတ်သက်ပြီး တစ်စုံတစ်ရာ တုန့်ပြန်ထားတာ မရှိသေးပါဘူး။
နှစ်သစ်ကူးကာလမှာ စစ်တပ်ဟာ ရှမ်းမြောက်၊ ရခိုင်နဲ့ ကရင်နီပြည်က တော်လှန်ရေး အင်အားစုတွေ ထိန်းချုပ်ထားတဲ့ ဒေသမှာ လေကြောင်းနဲ့ ဗုံးဆက်တိုက် ကြဲနေပြီး အရပ်သား ထိခိုက်သေဆုံးမှုလည်း ဆယ်နဲ့ချီ ရှိခဲ့ပါတယ်။
