အင်းငယ်၊ ဖေဖော်ဝါရီ ၂၁ ရက်၊ အင်းလေး
ရှမ်းတောင် ညောင်ရွှေမြို့နယ် အင်းလေးတောင်ပိုင်းဒေသမှာ စစ်ကောင်စီတပ်နဲ့ ပအိုဝ်းပြည်သူ့စစ်- PNA အတွက် ဒေသခံတွေက ထမင်းထုပ် ပို့ပေးနေရတယ်လို့ ဒေသတွင်း သတင်းရင်းမြစ်တွေက ရွှေဖီမြေကို ပြောပါတယ်။
စံကားမြို့အနီး ထီရီးရွာမှာ တပ်စွဲထားတဲ့ စစ်ကောင်စီ ပူးပေါင်းတပ်အတွက် မှော်ဘီရွာအပါအဝင် တောင်ဘက်တစ်ကြောရှိ ကျေးရွာအားလုံးကို ဖေဖော်ဝါရီလအတွင်း ထမင်းထုပ် ပို့ပေးဖို့ သတ်မှတ်ထားတာ ဖြစ်ပါတယ်။
ထီရေးရွာမှာ နေထိုင်တဲ့ ကရင်နီ စစ်ဘေးရှောင်တစ်ဦးက “ကြက်ဥဟင်း မပို့ရလို့ သတ်မှတ်ထားတယ်။ ဟင်းကတော့ ကောင်းရတယ်။ ဟင်းမကောင်းရင် ဒဏ်ကြေး ရှိတယ်။ ထမင်း မပို့ဘူးဆိုရင် မွေးထားတဲ့ကြက်တွေ ပေးရတယ်” လို့ ပြောပါတယ်။
စစ်ကောင်စီ ပူးပေါင်းတပ်အတွက် ထမင်းထုပ်ကို ၃ ရက်ခြားတစ်ရွာအလှည့်ကျ ပြောင်းပြီး အိမ်တစ်အိမ်ကို ထမင်းထုပ် ၉ ထုပ်နှုန်းနဲ့ ပို့ပေးရတယ်လို့ သိရပါတယ်။
ထမင်းထုပ် အလှည့်ကျသူတစ်ဦးက “အသားဟင်းချက်ရင် တစ်ပိဿာတောင် မလောက်ချင်ဘူး။ ထမင်းက ၉ ထုပ်လေ။ သူကြီးကိုယ်တိုင် လိုက်ပို့ရတယ်” လို့ ပြောပါတယ်။
ထမင်းထုပ်ကို မနက် ၅ နာရီ နောက်ဆုံးထား ပို့ဆောင်ရတာကြောင့် ချက်ပြုတ်ရတဲ့ ရွာခံတွေအတွက် အိပ်ရေးပျက်တာ ကြုံတွေ့နေရပြီး ကားရှိတဲ့ အိမ်တွေက အလှည့်ကျ ပို့ပေးရတာကြောင့် ငွေကြေးကုန်ကျမှု များလာတယ်လို့လည်း ဆိုပါတယ်။
၂၀၂၅ ခုနှစ် နှစ်ဦးပိုင်းအတွင်း ညောင်ရွှေနဲ့ ဖယ်ခုံမြို့နယ်မှာ စစ်ရေး တင်းမာနေပြီး စစ်တပ်ရဲ့ ပစ်ခတ်မှုကြောင့် အရပ်သား ၇ ဦး သေဆုံးခဲ့သလို ၂၄ ဦးလည်း ဒဏ်ရာ ရရှိခဲ့ပါတယ်။
အခုလို စစ်ရေး တင်းမာမှုကြောင့် အင်းလေးတောင်ပိုင်းဒေသက ကျေးရွာတွေဟာ ထီရီးရွာမှာ တိမ်းရှောင်နေရပြီး စစ်တပ်က စစ်ဘေးရှောင်တွေအပေါ် အနိုင်ကျင့် အမြတ်ထုတ်နေတယ်လို့ သိရပါတယ်။
