ခိုင်လေး၊ ဧပြီ ၈ ရက်၊ စစ်ကိုင်း
စစ်ကောင်စီ ထိန်းချုပ်ထားတဲ့ စစ်ကိုင်းတိုင်း မင်းကွန်းဒေသမှာ ငလျင်လှုပ်ခတ်မှုကြောင့် ပြိုကျပျက်စီးသွားတဲ့ ရှားပင်တိုက်သစ် စာသင်တိုက်မှာ ကူညီကယ်ဆယ်ရေး ရောက်လာတာ မရှိဘူးလို့ သွားရောက်ကူညီပေးနေတဲ့ ဒေသခံတစ်ဦးက ရွှေဖီမြေကို ပြောပါတယ်။
ကူညီကယ်ဆယ်ရေး မရောက်ရှိတဲ့ မင်းကွန်းဒေသမှာ စစ်တပ်နဲ့ PDF တိုက်ပွဲ ဖြစ်ပွားနေတာရှိပြီး အဲဒီမှာ ပျူစောထီး အများစု ရှိပြီးတော့ စစ်ကောင်စီတပ် ဂိတ်တွေကို ဖြတ်ရင်လည်း စစ်ဆေးမှု တင်းကြပ်တာကြောင့် ကူညီကယ်ဆယ်ရေးအသင်းတွေက သိပ်မသွားရဲကြဘူးလို့ ဆိုပါတယ်။
”သူတို့တွေက မိုးကာတွေ လိုမယ်။အစားအသောက်တွေ လိုမယ်။ ဘုန်းဘုန်းအနေနဲ့က ပျက်စီးသွားတဲ့ ကျောင်းကို အသစ်ပြန်ဆောက်ချင်တာ။ ကိုရင်တွေက တအာင်းကိုရင်တွေ များတယ်။ သံဃာ တအားများလို့ နေရေးထိုင်ရေးကအစ ဒုက္ခရောက်နေတာ”
မင်းကွန်းဒေသမှာ စစ်တပ်နဲ့ PDF တိုက်ပွဲဖြစ်ပွားနေတာကြောင့် စစ်ကောင်စီတပ်က အဲဒီဒေသဘက် အသွားအလာ တင်းကြပ်နေတယ်လို့ အမျိုးသားတစ်ဦးက ပြောပါတယ်။
”တော်ရုံ ရိုးရိုးကားတွေဆို ပေးမသွားဘူး။ အဲမှာက ပျူစောထီးတွေလည်း ရှိတယ်။ အဲကြောင့် အလှူရှင်တွေ သိပ်မရောက်ကြဘူး။ အဲမှာ စာသင်တဲ့ ကိုယ်တော်တွေ ရာကျော် ရှိမယ်ထင်တယ်။ အတိအကျတော့ မသိဘူး။ ကျနော်လည်း အလုပ်များတော့ အဲဒါတွေ မမေးဖြစ်လိုက်ဘူး”
မင်းကွန်းဒေသမှာ တိုက်ပွဲ ဖြစ်ပွားနေတာကြောင့် ဖုန်းလိုင်းလည်း ဖြတ်တောက်ထားပြီး အနီးအနားမှာရှိတဲ့ ကျေးရွာက လူတွေလည်း ရွာတွေမှာ မနေရဲကြတာကြောင့် ထွက်ပြေးနေကြရတယ်လို့ ဆိုပါတယ်။
မြသိန်းတန်အထိ စစ်တပ် ထိန်းချုပ်ထားတာဖြစ်ပြီး မြသိန်းတန်အကျော် အခြားဒေသတွေကိုတော့ PDF ဘက်က ထိန်းချုပ်ထားတာ ဖြစ်ပါတယ်။
ပြီးခဲ့တဲ့ ဖေဖော်ဝါရီ ၂၈ ရက်က လှုပ်ခတ်ခဲ့တဲ့ ငလျင်ဒဏ်ကြောင့် ကျောင်းဆောင် ပြိုကျပြီး ကိုရင်တစ်ပါးလည်း ပျံလွန်တော်မူခဲ့တယ်လို့ ဆိုပါတယ်။
မနေ့ ဧပြီ ၇ ရက်အထိ စစ်ကောင်စီရဲ့ စာရင်းအရ ငလျင်ဒဏ်ကြောင့် သေဆုံးသူ ၃,၆၀၀ ဦး၊ ဒဏ်ရာရသူ ၅,၀၁၇ ဦးနဲ့ ပျောက်ဆုံးသူ ၁၆၀ ဦး ရှိနေသေးကြောင်း ထုတ်ပြန်ထားပါတယ်။
