မိုင်းရူပ၊ မတ်လ ၃၀ ရက်၊ အင်းလေး
ရှမ်းတောင် အင်းလေးဒေသ ညောင်ရွှေမြို့နယ်ထဲ ငလျင်ကြောင့် သေဆုံးသူရဲ့ အလောင်းတွေကို မီးသဂြိုလ်ပေးနေပြီး အဆောက်အဦး ပိမိပြီး ကယ်ထုတ်မရတဲ့သူ ထပ်ရှိနေတယ်လို့ ကယ်ဆယ်ရေး လုပ်နေသူတွေက ရွှေဖီမြေကို ပြောပါတယ်။
ငလျင်ဒဏ်ကြောင့် ညောင်ရွှေမြို့နယ် နန်းပန်မြို့အနီးရှိ ရေပေါ်က ကျေးရွာတွေ အထိအခိုက် များပြီး ကေလာရွာမှာ အဆောက်အဦး ပိမိပြီး ကယ်ထုတ်လို့ မရသေးတဲ့သူ ထပ်ရှိနေတယ်လို့ ဆိုပါတယ်။
“ကေလာရွာတစ်အိမ် လူ ထုတ်မရသေးဘူး။ အသက်ကတော့ ဘယ်လိုမှ မရှင်နိုင်ဘူး။ မနေ့က ၃ ထပ်အိမ်ရဲ့ အောက်ဆုံးက နှစ်လောင်း ထုတ်တာ ဘက်ဖိုးတွေနဲ့ ထုတ်ရတယ်” လို့ အင်းလေးမှာ ကယ်ဆယ်ရေး လုပ်နေသူ အမျိုးသားတစ်ဦးက ရွှေဖီမြေကို ပြောပါတယ်။
မနေ့ မတ်လ ၂၉ ရက်အထိ ရရှိထားတဲ့စာရင်းအရ ကေလာရွာမှာ အလောင်း ၅၀ ကျော်၊ ကြတောရွာက ၅ လောင်းနဲ့ သလဲ့ဦးရွာမှာ ၂ လောင်း တွေ့ရှိထားပြီး နေအိမ် ထောင်နဲ့ချီလည်း ပျက်စီးခဲ့ပါတယ်။
ပအိုဝ်းလူငယ်အစည်းအရုံး- PYO ရဲ့ မနေ့အထိ စာရင်းအရ အင်းလေးဒေသမှာ ငလျင်ဒဏ်ကြောင့် သေဆုံးသူ ၅၀ ဦးနဲ့ နေအိမ် ၁,၉၂၇ လုံး ပျက်စီးခဲ့တယ်လို့ ထုတ်ပြန်ထားပါတယ်။
မန္တလေးမြို့ အရှေ့မြောက်ဘက် ၁၂ မိုင်အကွာကို ဗဟိုပြုပြီး လှုပ်ခတ်ခဲ့တဲ့ ငလျင်ဟာ ပြင်းအား ၇.၇ အဆင့်ရှိပြီး သေဆုံး ဒဏ်ရာရသူ များနေပြီး အထင်ကရ နေရာတွေအပါအဝင် အဆောက်အဦး အများစုလည်း ထိခိုက်ပျက်စီးခဲ့ပါတယ်။
မနေ့ မတ်လ ၂၉ ရက် ညနေပိုင်းအထိ နိုင်ငံတစ်ဝန်းမှာ ငလျင် လှုပ်ခတ်မှုကြောင့် သေဆုံးသူ ၁,၆၄၄ ဦးနဲ့ ဒဏ်ရာရသူ ၃,၄၀၈ ဦး ရှိလာပြီလို့ စစ်ကောင်စီက ထုတ်ပြန်ထားပြီး ထိခိုက်သေဆုံးသူ အရေအတွက် ထပ်တိုးလာနိုင်ပါတယ်။
