ရွှေဖီမြေ၊ စက်တင်ဘာ ၇ ရက်
ပြည်သူ့ခုခံတွန်းလှန်စစ် ၄ နှစ်ကာလအတွင်း စစ်တပ်ရဲ့ ရဟတ်ယာဉ် ၂ဝ စီးထဲက ၁၁ စီးကို တော်လှန်ရေးတပ်ဖွဲ့တွေ ပစ်ချနိုင်ခဲ့ပြီးတော့ ၉ စီးက ပျက်ကျခဲ့ပြီး စစ်သား ၆ သောင်းကျော် သေဆုံးခဲ့ပါတယ်။
အမျိုးသား ညီညွတ်ရေးအစိုးရ- NUG ရဲ့ ကာကွယ်ရေးဝန်ကြီးဌာန- MOD က ပြည်သူ့ခုခံတွန်းလှန်စစ် ၄ နှစ်ပြည့် အစီရင်ခံစာမှာ စစ်ကောင်စီရဲ့ တပ်သား၊ ရဲနဲ့ နယ်ခြားစောင့်တပ်အပါအဝင် ၆ သောင်းကျော် (၆ဝ,၃၃၁ ဦး)သေဆုံးခဲ့ပြီးတော့ ဒဏ်ရာ ရသူ ၂ သောင်းကျော် (၂၆,၉ဝ၅ ဦး)အထိ ရှိခဲ့ပြီး စုစုပေါင်း ၉ သောင်းနီးပါး ပြုန်းတီးခဲ့တယ်လို့ ဆိုပါတယ်။
စစ်တပ်ရဲ့ လေကြောင်း တိုက်ခိုက်မှု၊ ဒရုန်းဗုံး ကြဲချမှုနဲ့ သတ်ဖြတ်မှုအပါအဝင် ၄ နှစ်အတွင်း အရပ်သား ၁ သောင်းကျော် (၁၃,၃၅၃)ဦး သေဆုံးခဲ့ပြီး ဒဏ်ရာရသူ ၁ သောင်းကျော် (၁၆,၉၄၃ ဦး)နဲ့ ဖမ်းဆီးထိန်းသိမ်းခံရသူ ၅ သောင်းနီးပါး (၄၈,၉၁၁ ဦး)အထိ ရှိခဲ့ပါတယ်။
ဒါ့အပြင် စစ်တပ်ရဲ့ မီးရှို့ဖျက်ဆီးမှုကြောင့် စစ်ကိုင်း၊ မကွေး၊ မန္တလေး၊ ပဲခူး၊ တနင်္သာရီ တိုင်းဒေသကြီး ၆ ခု၊ မြို့နယ် ၇၇ ခုမှ ကျေးရွာ ၃ ထောင်နီးပါး (၂,၇၇၅ ရွာ)က အိမ်ခြေ ၁ သိန်း ၃ သောင်းကျော် မီးရှို့ဖျက်ဆီးခံခဲ့ရပြီး စစ်ကိုင်းတိုင်းက အများဆုံးဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
စစ်အာဏာသိမ်းပြီးနောက် စစ်တပ်ဟာ လူထုတွေအပေါ် နေ့စဉ်နဲ့အမျှ သတ်ဖြတ်မှု စစ်ရာဇဝတ်မှုတွေကို ကျူးလွန်ခြင်းနဲ့ တိုင်းပြည်ရဲ့ နိုင်ငံရေး၊ စီးပွားရေး၊ လူမှုရေးတွေကို အလုံးစုံ ဖျက်ဆီးခဲ့သူဖြစ်တယ်လို့ ရေးသားဖော်ပြထားပါတယ်။
ပြီးခဲ့တဲ့ ဇူလိုင်လမှာ စစ်တပ်က နိုင်ငံတော်စီမံအုပ်ချုပ်ရေးကောင်စီ- SAC ကနေ နိုင်ငံတော်လုံခြုံရေးနဲ့ အေးချမ်းသာယာရေးကော်မရှင်- SSPC အဖြစ် ပြောင်းလဲခဲ့ပေမဲ့ ၎င်းတို့ ကျူးလွန်ထားတဲ့ စစ်ရာဇဝတ်မှု၊ အကြမ်းဖတ်မှု သမိုင်းဆိုးကို ဖျောက်ဖျက်ဖုံးကွယ်နိုင်မှာ မဟုတ်ကြောင်း ရေးသားထားပါတယ်။
စစ်အာဏာသိမ်းမှုကို ဖယ်ရှားပြီး မြန်မာစစ်တပ်ရဲ့ နိုင်ငံရေး ပါဝင်နေခြင်း အဆုံးသတ်ရေးဆိုတဲ့ ဦးတည်ချက်နဲ့အတူ အမျိုးသား ညီညွတ်ရေးအစိုးရ၊ ပြည်သူ့ကာကွယ်ရေးတပ်မတော်အနေနဲ့ မဟာမိတ် တော်လှန်ရေးအင်အားစုတွေနဲ့အတူ တော်လှန်ရေးပန်းတိုင် မရောက်မချင်း ဆက်လက် ကြိုးပမ်းဆောင်ရွက်သွားမယ်လို့ ဖော်ပြထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
