အင်းငယ်၊ ဖေဖော်ဝါရီ ၆ ရက်၊ တောင်ကြီး
ရှမ်းတောင် တောင်ကြီးမြို့နယ် နောင်ကားကျေးရွာအုပ်စုမှာ ပြည်ပသို့ ရောက်ရှိနေတဲ့ အမျိုးသမီးတွေအတွက် စစ်မှုထမ်းစရိတ် ၆ သိန်းနဲ့အထက် ကောက်ခံနေတယ်လို့ ဒေသတွင်း သတင်းအရင်းအမြစ်တွေက ပြောပါတယ်။
နောင်ကားကျေးရွာအုပ်စု လွယ်စင်းနဲ့ တဲခဲရွာမှာ ဖေဖော်ဝါရီ လဆန်းကတည်းက အမျိုးသမီး စစ်မှုထမ်းစာရင်း ကောက်ခံနေပြီး ပြည်ပသို့ ရောက်ရှိနေသူတွေကို လူအစားထိုးစရိတ်အဖြစ် အခုလို သတ်မှတ်ထားတာ ဖြစ်ပါတယ်။
တဲခဲရွာအတွင်း နေထိုင်သူ အမျိုးသမီးတစ်ဦးက “ပအိုဝ်းရွာတွေမှာ ဒီလို ကောက်တာတော့ မဆန်းတော့ပါဘူး။ အရင်ကတော့ PNO ကောက်တာပေါ့။ အခုကတော့ စကစပေါ့။ လူပဲ ပြောင်းသွားတာပါ။ ထည့်ရတာက အတူတူပဲ” လို့ ပြောပါတယ်။
အဲဒီကျေးရွာ ၂ ရွာက အမျိုးသမီး အများစုဟာ အရွယ်ရောက်စဉ်ကတည်းက ထိုင်းနိုင်ငံမှာ သွားရောက် လုပ်ကိုင်နေကြပြီး အောက်ခြေသိမ်းအလုပ် ဖြစ်တဲ့အတွက် ရတဲ့လစာနဲ့ ပေးဆောင်ဖို့ အခက်အခဲ ရှိတယ်လို့ သိရပါတယ်။
ဒါ့အပြင် ရွာခံတွေအနေနဲ့လည်း တစ်ခါတည်း ပေးဆောင်ဖို့ ခက်ခဲတာကြောင့် ရွာသူကြီးကနေတဆင့် အကြိမ်ကြိမ် ခွဲဆောင်ရဖို့ တင်ပြသွားမယ်လို့ ဆိုပါတယ်။
ထိုင်းနိုင်ငံရောက် နောင်ကားဒေသခံ အမျိုးသမီးတစ်ဦးက “ရွာမှာတော့ သိပ်မစိုးရိမ်ရပါဘူး။ တော်တော်များများက ထိုင်းမှာဆိုတော့လေ။ ပိုက်ဆံ ထည့်ဖို့ပဲ နည်းနည်း ဒုက္ခရောက်တာ” လို့ ပြောပါတယ်။
စစ်ကောင်စီက အမျိုးသမီး စစ်မှုထမ်းကို အသက် ၃၀ အရွယ်အထိ သတ်မှတ်ထားပေမဲ့ နောင်ကားကျေးရွာအုပ်စုမှာတော့ အသက် ၂၈ နှစ်အထိသာ စာရင်းကောက်ခံထားတာကို တွေ့ရပါတယ်။
မြေပြင်မှာ ရှုံးနိမ့်နေတဲ့ စစ်တပ်ဟာ စစ်မှုထမ်း ရရှိဖို့ ခက်ခဲလာပြီး လက်ရှိမှာ အမျိုးသား အပတ်စဉ် ၁၀ အတွက်လည်း အပူတပြင်း ရှာဖွေနေရသလို လာမယ့်လတွေမှာ အမျိုးသမီး အပတ်စဉ် ၁ ကို ခေါ်ယူဖို့အတွက် အခုကတည်းက စာရင်းကောက်နေတာ ဖြစ်ပါတယ်။
