အင်းငယ်၊ ဖေဖော်ဝါရီ ၂၆ ရက်၊ တောင်ကြီး
ရှမ်းတောင် တောင်ကြီးမြို့မှာ ၂၀၂၅ ခုနှစ်အတွင်း အိမ်ငှားခ စံချိန်တင် မြှင့်တက်နေပြီး ထိုင်းနိုင်ငံက ဈေးနှုန်းထက် ပိုမြှင့်လာနေတယ်လို့ တောင်ကြီးဘက် စစ်ဘေးရှောင်နေရတဲ့ ဒေသခံတွေက ပြောပါတယ်။
တောင်ကြီးမြို့မှာ ပြီးခဲ့တဲ့ ၂၀၂၄ ခုနှစ်အတွင်း အိမ်လုံးချင်းတစ်လုံးကို တစ်လ ပျမ်းမျှ ၅ သိန်းဝန်းကျင်သာ ရှိခဲ့ရာက လက်ရှိမှာ ၈ သိန်းကျပ်အထိ မြှင့်တက်နေတာ ဖြစ်ပါတယ်။
တောင်ကြီးရောက် ကရင်နီ စစ်ဘေးရှောင် အမျိုးသမီးတစ်ဦးက “ဈေးက တစ်နှစ်ထက်တစ်နှစ် ပိုလာတယ်။ နေရာပြောင်းမယ်ဆိုတော့လည်း ဒီမှာပဲ လုပ်စားရတာ အဆင်ပြေတယ်လေ။ စစ်ဘေးရှောင်စခန်းသွားရင် လုပ်စားဖို့ကမရှိ။ သူများလှူတာလည်း အကြာကြီး ထိုင်မစားချင်ဘူး။ ပွဲစားတွေကြောင့် ဈေးတက်တာပါ” လို့ ပြောပါတယ်။
တောင်ကြီးမြို့မှာ ပျှမ်းမျှ တစ်လဈေးနှုန်းအနေနဲ့ ကွန်ဒို ၅ သိန်း၊ ရိုးရိုးအိမ် ၈ သိန်း၊ ခြံဝန်းအနည်းငယ်ကျယ်တဲ့အိမ် ၁၀ သိန်းကျော် စတဲ့ပေါက်ဈေးအထိ ရှိနေတယ်လို့ ပွဲစားတွေဆီက သိရပါတယ်။
အိမ်ငှားခဈေးနှုန်း မြှင့်တက်တာအပြင် ငှားထားတဲ့ အိမ်တွေဟာ အနည်းဆုံး ၆ လ ချုပ်ရတာ၊ နေမယ့်လူဦးရေ သတ်မှတ်ထားပြီး အိမ်ရှင်က လာစစ်ဆေးတာကြောင့် ကုန်ကျစရိတ် ပိုများလာတယ်လို့ စစ်ဘေးရှောင်တွေက ပြောပါတယ်။
ပင်လောင်းကနေ တောင်ကြီးမြို့မှာ ယာယီလာရောက်တိမ်းရှောင်သူတစ်ဦးက “ကျမသမီးဆို ထိုင်းမှာလေ။ ဟိုမှာတောင် တိုက်ခန်းတွေ၊ လုံးချင်းအိမ်တွေ သာမန်ဆို ဘတ် ၃,၅၀၀-၄,၀၀၀ ဝန်းကျင်ပဲ။ အခုပေါက်ဈေးနဲ့ဆို တောင်ကြီးထက် အများကြီးနည်းတယ်။ အခြေခံပစ္စည်းတွေလည်း ပါတယ်။ အခုက လွန်လွန်းတယ်” လို့ ပြောပါတယ်။
တောင်ကြီးမြို့ရှိ စစ်ဘေးရှောင်တွေဟာ သောက်သုံးရေနဲ့ မီတာခကိုလည်း ဈေးကြီးပေးဆောင်နေရတာကြောင့် တစ်လကို ပျှမ်းမျှ ၂ သိန်းခန့် ပိုကုန်ကျနေတယ်လို့လည်း သိရပါတယ်။
တောင်ကြီးမြို့မှာ နှစ်စဉ် နှစ်သစ်ကူးတစ်ခါရောက်တိုင်း အိမ်ငှားခ၊ အဆောင်ခ ဈေးတက်လေ့ရှိပြီး စစ်အာဏာမသိမ်းခင်က တစ်လ ပျမ်းမျှ ၂ သိန်း ပေးရတဲ့ အိမ်တွေဟာ လက်ရှိမှာ ၈ သိန်းအထိ ပေါက်ဈေး ရှိနေတယ်လို့ ငှားရမ်းသူတွေက ပြောဆိုကြပါတယ်။
