ပို့လဘား၊ ဧပြီ ၈ ရက်၊ နမ့်ခမ်း
တအာင်းတပ်မတော်-TNLA ထိန်းချုပ်ထားတဲ့ ရှမ်းမြောက် နမ့်ခမ်းမြို့နယ်က ကျေးရွာတချို့မှာ ရှမ်းပြည်တိုးတက်ရေးပါတီ-SSPPက ဆန်စက်ရုံပိုင်ရှင်တွေထံ ဆန် ၆ အိတ် တောင်းခံခဲ့တယ်လို့ ဒေသခံတွေက ပြောပါတယ်။
ပြီးခဲ့တဲ့ ဧပြီ ၆ ရက်မှာ ကျေးရွာမှာရှိတဲ့ ဆန်စက်ရုံပိုင်ရှင်တွေက တစ်နှစ်စာအတွက် ဆန် ၆ အိတ်နဲ့ ပေးဆောင်ခဲ့ရတယ်လို့ အမျိုးသားတစ်ဦးက ရွှေဖီမြေကို ပြောပါတယ်။
SSPP တပ်ဟာ တစ်လကိုတစ်ကြိမ် ပုံမှန်ကောက်နေတာကြောင့် ဆန်စက်ပိုင်ရှင်တွေက အခွန်ကောက်တာ လျှော့ပေးစေချင်တယ်လို့ ပြောပါတယ်။
“သူတို့တောင်းတာ အရမ်းများလွန်းတယ်။ ကျနော်တို့ဘက် ပေးတာတွေလည်း ရှိပါတယ်။ သူတို့လာကောက်တဲ့အချိန်ဆို ဘယ် ၂ပြည်ပဲ ထည့်ခိုင်းထည့်ခိုင်း ထည့်ပေးတယ်။ TNLAဘက် လာကောက်ရင်လည်း ကျနော်တို့ ထည့်ပေးတယ်။ အခုကျတော့ အရမ်းများလွန်းတယ်။ ဆန်တစ်အိတ်ကို ၁ သိန်းခုနှစ်သောင်းရှိတယ်။ ၆အိတ်ဆိုတော့ ၁၀သိန်းဝန်းကျင်ရှိပြီလေ။ ဒီအခြေနေနဲ့ဆိုတော့ ကျနော်တို့ ဆန်စပါးကောင်းကောင်းမကြိတ်ရဘူး။ကျနော်တို့လည်း အကြပ်အတည်းကာလမို့လို့ လျှော့တောင်းစေချင်တယ်” လို့ အဆိုပါအမျိုးသားက ပြောပါတယ်။
တအာင်းတပ်-TNLAဘက်က အိတ်လိုက်မတောင်းဘဲ ပြည်လိုက်ပဲ တောင်းတာကြောင့် SSPPဘက်ကလည်း လျှော့တောင်းစေချင်တယ်လို့ သူက ဆိုပါတယ်။
ပြီးခဲ့တဲ့ ဧပြီ ၁ ရက်မှာ ကျေးရွာ အုပ်ချုပ်ရေးမှူးက ဆန်စက်ပိုင်ရှင်တွေဆီ အခွန်ပြေစာရွက်နဲ့ လာရောက်ပေးခဲ့တာ ဖြစ်တယ်လို့ ဆိုပါတယ်။
အဆိုပါကိစ္စနဲ့ ပတ်သက်ပြီး အသေးစိတ်သိရဖို့ SSPPရဲ့ ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်ကို ရွှေဖီမြေက ဖုန်းနဲ့ ဆက်သွယ်ခဲ့ပေမယ့် ဖုန်းလက်ခံဖြေဆိုတာ မရှိပါဘူး။
ပြီးခဲ့တဲ့ ၂၀၂၄ ခုနှစ်မှာလည်း SSPP တပ်ဟာ မူဆယ်မြို့မှာရှိတဲ့ ကုန်စုံဆိုင်နဲ့ ဆေးခန်းတွေကို အခွန်ဆောင်ကဒ်တွေ လိုက်လံပေးပြီး ခြိမ်းခြောက်ငွေ ငွေကောက်ခံသွားတာတွေလည်း လုပ်ဆောင်ခဲ့ပါတယ်။
