ပို့လဘား၊ မေလ ၂၈ ရက်၊ ရှမ်းတောင်
ရှမ်းတောင်မှာ စိုက်ပျိုးပြီး ထွက်ရှိလာတဲ့ ဂေါ်ဖီထုပ် တစ်ထုပ်ကို ၂၀၀ ကျပ်ပဲရလို့ တောင်သူတွေက အရှုံးပေါ်နေရတယ်လို့ ဒေသခံတွေက ပြောပါတယ်။
ရှမ်းတောင် အောင်ပန်းမြို့မှာ ထွက်ရှိတဲ့ အဲဂေါ်ဖီထုပ်တွေဟာ အထွက်နှုန်းများလာတာကြောင့် လက်ရှိအခြေအနေအရ အဝေးကို တင်ပို့လို့မရတဲ့အတွက်ကြောင့် တစ်ထုပ်ကို ၂၀၀ ကျပ်နဲ့ ၃၀၀ကျပ်သာ ရရှိနေတယ်လို့ ခြံပိုင်ရှင်တစ်ဦးက ပြောပါတယ်။
ပြီးခဲ့တဲ့ နှစ်တွေဟာ ဂေါ်ဖီထုပ်တစ်ထုပ်ကို ၂၅၀၀ နဲ့ ၃၀၀၀ ကျပ်ရှိရာကနေ ဒီနှစ်မှာတော့ ၂၀၀နဲ့ ၃၀၀ကျပ်သာ ကျဆင်းလာပြီး ခြံပိုင်ရှင်တွေအနေနဲ့ ဂေါ်ဖီထုပ်ကို ခူးပြီးရောင်းချတာမျိုးမလုပ်တော့ဘဲ လိုအပ်သူတွေကို အခမဲ့ခူးခွင့်ပေးပြီး အခင်းမှာကျန်ရှိနေတဲ့ ဂေါ်ဖီထုပ်တွေကိုလည်း အခင်းလိုက်ဖျက်ပစ်နေရတယ်လို့ ဆိုပါတယ်။
“ဒီနှစ်က ပိုများတဲ့ရာသီဥတုဖြစ်တယ်ဆိုတော့လေ အပြန်အဆိုင်ထွက်ကြတယ်။ ဂေါ်ဖီထုပ်က ရေများရင် ထွက်ကြတယ်။ ကျနော်တို့က ပွဲရုံမှာ ၂၀၀ ပေးရင် အပြည့်အဝမရဘူး ကားခ၊အလုပ်သမားခတွေ ပွဲခတွေပေးရတယ်။ အဲလိုပေးရတာဆိုတော့ ကျနော်တို့ တောင်သူတွေက အပြည့်မရဘူးလေ။ ထမ်းခ ခုတ်ခက တစ်ထုပ် ၅၀ရှိတယ်၊ ကားအပေါ်ရောက်ရင်၊ ကားခလည်း အနီးအဝေးပေါ်မူတည်တာပေါ့။ အဲဟာကြောင့် ကျနော်တို့အတွက် ဘာမှမကျန်ဘူးလေ။ ဒီချိန်၂၀၀ဆိုတော့ ဘာမှမရဘူးလေ။ ဒီခေတ်ကာလဆိုရင် အဲ၂၀၀ က ကော်ဖီတစ်ထုပ်တောင်မရတော့ဘူးလေ။ အဲဒါကြောင့် ဘုန်းကြီးကျောင်းတွေလိုရင် ခုတ်ပြီး လှူပေးလိုက်တယ်”
ပြီးခဲ့တဲ့ နှစ်တွေမှာ ရန်ကုန်၊ မော်လမြိုင်နဲ့ မြဝတီ အပါအဝင် တခြားဒေသတွေက အခင်းအထိ လာရောက်ဝယ်ယူတာဖြစ်ပြီး ဒီနှစ်မှာတော့ လမ်းပိတ်ဆို့မှုကြောင့် လာရောက်ဝယ်သူနည်းသွားတယ်လို့ အမျိုးသမီးတစ်ဦးက ပြောပါတယ်။
“အရင်တုန်းက ဒီရှမ်းတောင်မှာ ထွက်တဲ့ ဂေါ်ဖီထုပ်တွေက မြဝတီဘက်ဆင်းတာ။ အခုက ကားလမ်းပိတ်တာရယ်၊ မြဝတီဘက်မှာပိတ်နေတာရယ် နယ်စပ်တွေပိတ်နေတော့ ရောင်းမရတော့ဘူး။ ဗမာပြည်ဘက်မဆင်းဘူးဆိုရင် ဒီအောင်ပန်းမှာလည်း ဒီဟာတွေပဲ ထွက်နေတာဆိုတော့ မဝယ်စားဖြစ်တော့ဘူးလေ။ အခုလမ်းတွေလည်း ပိတ်နေတာဆိုတော့လေ ကြာကြာထားလို့မရဘူး။ ၃ ရက်လောက်ထားရင်လည်း ပုပ်ကုန်ပြီ။ အလကားလာယူခိုင်းရင်လည်း ဘယ်သူမှမယူဘူးလေ။ ကားခတွေဈေးကြီးနေလို့ ဆိုပြီး ပြောကြတယ်”
ပြီးခဲ့တဲ့ ၂၀၂၄ ခုနှစ် စက်တင်ဘာလကလည်း အောင်ပန်းမှာထွက်တဲ့ ခရမ်းချဉ်သီးကို တစ်ပိဿာ ၃၀၀ကျပ်ပဲရလို့ တောင်သူတွေက အရှုံးပေါ်ပြီး အများအပြားသွန်ပစ်နေရတဲ့ ဖြစ်စဉ်လည်း ရှိခဲ့ဖူးပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
