မိုင်းရူပ၊ ဧပြီ ၂ ရက်၊ နေပြည်တော်
စစ်ကောင်စီ ရုံးစိုက်ရာ နေပြည်တော်မှာ ငလျင်ကြောင့် ဝန်ထမ်းအိမ်ယာအများစု ပြိုကျပြီး အလောင်းတွေ ထုတ်လို့ မရသေးတာကြောင့် အပုပ်နံ့ ဆိုးဆိုးဝါးဝါး ထွက်နေတယ်လို့ ဒေသခံတွေက ရွှေဖီမြေကို ပြောပါတယ်။
ငလျင်ကြောင့် ပြိုကျပျက်စီးသွားတဲ့ နေရာတွေကို နိုင်ငံတကာ ကူညီကယ်ဆယ်ရေးအဖွဲ့အပါအဝင် ကူညီကယ်ဆယ်ရေးလုပ်ငန်း ဆက်လုပ်နေတယ်လို့ ဆိုပါတယ်။
“ကယ်ဆယ်ရေးတွေ လုပ်နေတယ်။ တချို့ နိုင်ငံတကာ အဖွဲ့တွေလည်း ရောက်နေတယ်။ စစ်ရုံးလည်း ထိတယ်။ အပုတ်နံ့တွေလည်း တော်တော်ဆိုးနေတယ်” လို့ နေပြည်တော်မှ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
ငလျင် လှုပ်ခတ်မှုကြောင့် နေပြည်တော်မှာ လွှတ်တော်အဆောက်အဦးအပါအဝင် စစ်ကောင်စီရဲ့ ဝန်ကြီးရုံးလည်း ပျက်စီးမှု အများစု ရှိခဲ့ပါတယ်။
ဒါ့အပြင် စစ်ကောင်စီ ချိတ်ပိတ်ထားတဲ့ နေပြည်တော်ရှိ အမျိုးသား ညီညွတ်ရေးအစိုးရ- NUG ရဲ့ ကာကွယ်ရေးဝန်ကြီး ဦးရည်မွန်ရဲ့ နေအိမ်လည်း ငလျင် လှုပ်ခတ်မှုကြောင့် ပျက်စီးသွားတယ်လို့ သူက ဆက်ပြောပါတယ်။
ငလျင် လှုပ်ခတ်မှုဖြစ်ပြီး ၆ ရက်မြောက်နေ့ဖြစ်တဲ့ ဒီနေ့ ဧပြီ ၂ ရက်အထိ နေပြည်တော် ဥတ္တသီရိမြို့နယ် ဟိုတယ်အေးချမ်းမှာ ပိတ်မိနေတဲ့ အမျိုးသား ၁ ဦးကို အသက်ရှင်လျက် ကယ်ထုတ်နိုင်ခဲ့တယ်လို့ မီးသတ်ဦးစီးဌာနက ထုတ်ပြန်ထားပါတယ်။
ဒီနေ့ ဧပြီ ၂ ရက် နေ့လယ်ပိုင်းအထိ စစ်ကောင်စီ ထုတ်ပြန်ချက်အရ နိုင်ငံတဝန်းမှာ ထိခိုက်သေဆုံးသူ ၂,၈၈၆ ဦးနဲ့ ဒဏ်ရာရသူ ၄,၆၃၉ ဦးနဲ့ ပျောက်ဆုံးနေသူ ၃၇၃ ဦးအထိ ရှိခဲ့ပါတယ်။
