လွေးဇွန်မိုး၊ ဇူလိုင် ၂၇ ရက်၊ နမ့်လန်
စစ်ကောင်စီတပ် ထိန်းချုပ်ထားတဲ့ ရှမ်းမြောက် သီပေါမြို့နယ်၊ နမ့်လန်မြို့မှာ ဒေသခံတွေ ဝိုင်းဝန်းပြီး သူခိုးဖမ်းရာကနေ သူခိုး ၁၃ ဦး ဖမ်းမိခဲ့တယ်လို့ သိရပါတယ်။
မနေ့ ဇူလိုင် ၂၆ ရက် နေ့လည် ၃ နာရီဝန်းကျင်က နမ့်လန်မြို့လယ်မှာ ပစ္စည်းလိုက်ခိုးဖို့လုပ်နေတဲ့ အမျိုးသား ၁၁ ဦးနဲ့ အမျိုးသမီး ၂ ဦးတို့ကို ဒေသခံတွေက ဝိုင်းဝန်းဖမ်းဆီးခဲ့တာဖြစ်တယ်လို့ ဖြစ်စဥ်သိရှိသူ ဒေသခံ အမျိုးသမီးတစ်ဦးက ပြောပါတယ်။
“ဒေသခံ ဝိုင်းဖမ်းမိတယ်။ မြို့လယ်က ဝိုင်းဖမ်းတာ။ ပစ္စည်းယူတဲ့အချိန်မိလို့။ မိန်းကလေးတော့ နောက်တစ်ခါ မလုပ်ဖို့ ဆုံးမပြီး လွှတ်ပေးလိုက်ပြီ။ အခုတလော သူခိုးတွေ အရမ်းများတယ်။ ကြောက်စရာကြီး။ တွေ့ရာ အကုန်ယူကြတာပဲ။ တချို့သူခိုးတွေဆို ဓားတွေပါ ကိုင်ကြတာ”
ဖမ်းမိထားတဲ့ သူခိုးတွေထဲက အမျိုးသမီး ၂ ဦးကိုတော့ နောက်တစ်ခါထပ်မလုပ်ဖို့ပြောပြီး ပြန်လွှတ်ပေးခဲ့တယ်လို့ ဆိုပါတယ်။
ကျန်တဲ့ အမျိုးသား ၁၁ ဦးကိုတော့ တိုင်းရင်းသားလက်နက်ကိုင်အဖွဲ့တွေစီ သွားအပ်ခဲ့တယ်လို့ ဆိုပါတယ်။
ပြီးခဲ့တဲ့ ၂၀၂၄ ခုနှစ် ဇူလိုင် ၃၁ ရက်ကနေ ဩဂုတ် ၁ ရက်အထိ ဒေသခံတွေပူးပေါင်းပြီး နမ့်လန်မြို့ထဲက သူခိုး ၃၄ ဦးကို ဖမ်းမိခဲ့ပါတယ်။
စစ်ကောင်စီတပ် ထိန်းချုပ်တဲ့ဒေသတွေမှာ ခိုးမှုနဲ့ ဓားပြတိုက်မှုတွေ မကြာခဏဖြစ်နေပေမယ့် စစ်ကောင်စီတပ်က ဖမ်းဆီးအရေးယူနိုင်ခြင်းမရှိတာကြောင့် ဒေသခံတွေ ကိုယ်ထူကိုယ်ထစနစ်နဲ့ ဖမ်းနေရတာဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
