မိုင်းရူပ၊ ဇန်နဝါရီ ၂၀ ရက်၊ မိုးဗြဲ
ရှမ်းတောင်-ကရင်နီနယ်စပ် ဖယ်ခုံမြို့နယ် မိုးဗြဲမြို့မှာ စစ်ကောင်စီတပ်နဲ့ ကရင်နီတော်လှန်ရေး အင်အားစုတို့အကြား တိုက်ပွဲပြင်းထန်နေတယ်လို့ ကရင်နီအမျိုးသားများ ကာကွယ်ရေးတပ်- KNDF ရဲ့ ဗဟိုသတင်းနဲ့ ပြန်ကြားရေး တာဝန်ခံက ရွှေဖီမြေကို ပြောပါတယ်။
စစ်တပ်ဟာ မိုးဗြဲမြို့ကို ပြန်ထိန်းချုပ်ဖို့ ဖယ်ခုံမြို့ကနေ အင်အား အလုံးအရင်းနဲ့ ထိုးစစ်ဆင် တိုက်ခိုက်နေတာကြောင့် တိုက်ပွဲ ပြင်းထန်နေတာလို့ ဆိုပါတယ်။
“မနေ့ကတော့ တိုက်ပွဲ ပြင်းထန်တယ်။ စစ်ကောင်စီဘက်က အင်အား အလုံးအရင်းနဲ့ စစ်ကြောင်း ထိုးလာလို့ တိုက်ပွဲတွေ ဖြစ်ပွားနေတာ ဖြစ်ပါတယ်။ ဒီနေ့အထိလည်းတိုက်ပွဲတွေ ဖြစ်ပွားနေတုန်း ဖြစ်ပါတယ်” လို့ KNDF ရဲ့ ဗဟိုသတင်းနဲ့ ပြန်ကြားရေးတာဝန်ခံက ရွှေဖီမြေကို ပြောပါတယ်။
မြေပြင်အခြေအနေ သိရှိသူတစ်ဦးကလည်း ဒီရက်ပိုင်းအတွင်း မိုးဗြဲမှာ လက်နက်ကြီးသံတွေ နေ့စဥ်လိုလို ကြားနေရတယ်လို့ ပြောပါတယ်။
မိုးဗြဲမြို့ရဲ့ နေရာအများစုကို ကရင်နီတော်လှန်ရေးအင်အားစုတွေက ထိန်းချုပ်နိုင်ပေမဲ့ မြို့အနီးမှာ စစ်ကောင်စီရဲ့ ခြေမြန်တပ်ရင်း(ခမရ ၄၄၂) ကျန်ရှိနေတာ ဖြစ်ပါတယ်။
စစ်တပ်ဘက်ကတော့ မိုးဗြဲမြို့တိုက်ပွဲနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
