လွေးလာဝ်ဇာရ်၊ စက်တင်ဘာ ၁၇ ရက်၊ မိုင်းကိုင်
ရှမ်းတောင် မိုင်းကိုင်မြို့နယ်အတွင်းက ကျေးရွာတွေကို တပ်သားအသစ်စုဆောင်းဖို့အတွက် ရှမ်းပြည်တိုးတက်ရေးပါတီ SSPP တပ်က ဒေသခံတွေကို လိုက်လံဖမ်းဆီးနေပြီး ထွက်ပြေးသွားတဲ့ တပ်သားတွေရဲ့ မိသားစုဝင်တွေကိုလည်း ဖမ်းဆီးထားတာမျိုးတွေ ရှိနေတယ်လို့ ဖြစ်စဉ်သိရှိသူ မိုင်းကိုင်ဒေသခံ တစ်ဦးက ရွှေဖီမြေကို ပြောပါတယ်။
တပ်သားအဖြစ် စုဆောင်းခြင်းခံသွားရတဲ့ တပ်သားအများစုဟာ SSPP ထိန်းချုပ်ဒေသမှာ ဖွင့်လှစ်ထားတဲ့ ကျားဖြန့်(အွန်လိုင်းငွေလိမ်ဂိုဏ်း)လုပ်ငန်းတွေမှာ လုံခြုံရေးအဖြစ် သွားလုပ်ခိုင်းတာတွေလည်း ရှိနေတယ်လို့ ဆိုပါတယ်။
“ကျားဖြန့်တွေလည်း အများကြီးရှိတယ်။ SSPP က လိုက်ပြီး လုံခြုံရေးပေးနေတာ။ ရွာပိုင်းတွေမှာ ဖွင့်တာ တော်တော်ကိုများတယ်။ ဒေသခံတွေက ကျားဖြန်မှန်း မသိကြဘူး။ သူတို့က သင်တန်းကျောင်းဖွင့်နေတာလို့ဘဲ ဒေသခံတွေကို ပြောခိုင်းတာ။ ပြောရင်လည်း ဒေသခံတွေသိမှာမဟုတ်ဘူး။ ပြောင်းရွှေ့တာတွေ လုပ်ရင်လည်း ညပိုင်းဘဲ ပြောင်းရွှေ့တာ များတယ်”လို့ ပြောပါတယ်။
ကျားဖြန်တွေ ပြောင်းရွှေ့ဖို့ လုပ်တဲ့အချိန်မှာ စစ်ကောင်စီတပ်တွေဆီကို ငွေပေးပြီး ဖြတ်သွားဖြတ်လာ ပြုလုပ်တာမျိုးတွေလည်း ရှိတယ်လို့ သူက ပြောပါတယ်။
လက်ရှိ မိုင်းကိုင်မြို့နယ် တောင်ပေါ်ကျေးရွာအချို့မှာ ဒေသခံ အမျိုးသားတွေကို တပ်သားအသစ်စုဆောင်းဖို့အတွက် ဘုန်းကြီးကျောင်းမှာ စုခိုင်းထားတာမျိုးတွေလည်း ရှိနေတယ်လို့ သူက ဆိုပါတယ်။
ဒါ့အပြင် ပြည်ပရောက်ပြီး စစ်မှုမထမ်းနိုင်တဲ့ လူငယ်တွေကိုလည်း လူအစားထိုးခပေးဖို့ ၎င်းတို့ရဲ့ မိဘတွေထံ ငွေ သိန်းရာချီ တောင်းခံတာမျိုးလည်း ရှိတယ်လို့ သိရပါတယ်။
“မိုင်းကိုင်နယ်အတွင်းက ကျေးရွာတွေအားလုံးကို စစ်ကောက်တာ။ အများစု တအာင်းတွေဘဲ။ ရှမ်းတွေက နည်းတယ်။ ရှမ်းဆို ဗိုလ်အဆင့်တွေဘဲ ရှိတယ်။ ကျန်တာ အကုန်လုံး တအာင်းလူငယ်တွေဘဲ။ နိုင်ငံခြားထွက်ရင်လည်း မိဘတွေဖမ်းပြီး ပိုက်ဆံ တောင်းတယ်။ နည်းတဲ့ ပမာဏမဟုတ်ဘူး” လို့ အထက်ပါသူက ဆက်ပြောပါတယ်။
SSPP လုံခြုံရေး ပေးထားတဲ့ ကျားဖြန်ရှိတဲ့ နေရာတွေဟာ ကပ်ဖွီးရွာက ၂ နေရာ၊ စုံလောရွာရဲ့ အောက်မှာ ၁ နေရာ၊ လုံစံရွာက ၁ နေရာနဲ့ ဟိုခဲရွာက ၁ နေရာရှိပြီး တစ်နေရာကို လူအင်အား ၅ ရာကနေ ၁ ထောင်အထိ ရှိတယ်လို့ ဆိုပါတယ်။
ပြီးခဲ့တဲ့ ဇွန်လမှာလည်း နမ့်မော်ပျဉ်က ဒေသခံ ၃ ဦးကို SSPP တပ်က တားတာ မရပ်လို့ဆိုပြီး သေနတ်နဲ့ ပစ်သတ်သွားခဲ့တဲ့ဖြစ်စဉ်တွေလည်း ရှိခဲ့တယ်လို့ ဆိုပါတယ်။
အလားတူ ကုန်ပေါင်းကျေးရွာဘက်က သတင်းတွေ မထွက်ဖို့ SSPP တပ်က ဒေသခံတွေကို ဖိအားပေး တာမျိုးတွေ လုပ်ဆောင်နေတယ်လို့ နောက်ထပ် ဒေသခံတစ်ဦးက ပြောပါတယ်။
တပ်သားသစ် စုဆောင့်တဲ့ကျေးရွာတွေဟာ နမ့်မော်ပျဥ်၊ စုံလော၊ လွိုင်လမ်၊ နမ်လိန်း၊ ပန်မွန်း၊ ပန်နိမ်း၊ လွိုင်ရွဲ ၊လုံစံ၊ ကုန်ပေါင်း စတဲ့ ကျေးရွာတွေအပြင် ကျန်တဲ့ကျေးရွာတွေလည်း ပါဝင်နေတယ်လို့ ဆိုပါတယ်။
အဆိုပါဒီကိစ္စတွေနဲ့ ပတ်သက်ပြီး အချက်အလက်အသေးစိတ်သိရဖို့ SSPP တပ်ရဲ့ ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်ကို ရွှေဖီမြေက ဖုန်းနဲ့ စာပို့ဆက်သွယ်ခဲ့ပေမယ့် မရခဲ့ပါဘူး။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
