လွေးလာဝ်ဇာရ်၊ ဇန်နဝါရီ ၁၃ ရက်၊ မိုင်းကိုင်
ရှမ်းတောင် မိုင်းကိုင်မြို့နယ်မှာ တပ်သားသစ် တစ်ရွာတစ်ဦးနှုန်း ကောက်ခံနေတဲ့ ရှမ်းပြည်တပ်မတော်- SSPP/SSA က တစ်အိမ်တစ်ယောက်နှုန်း ပြောင်းလဲ ကောက်ခံနေတယ်လို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ နှစ်တွေမှာ တအာင်းရွာတွေမှာ တစ်ရွာကို တစ်ဦးသာ သွားရပေမဲ့ ဒီလကစပြီး တစ်အိမ်ကို တစ်ဦးနှုန်း စစ်မှု ထမ်းရမယ်လို့ ဆိုပါတယ်။
“အခုရွာမှာ ဆူဆူပူပူ ဖြစ်တာတော့ ရှမ်းရွာလို တအာင်းရွာလည်း တစ်အိမ်တစ်ယောက် မဖြစ်မနေ စစ်မှုထမ်း သွားရမယ်တဲ့။ အဖိုးအဖွားမကျန် အကုန်ကောက်တယ်။ ခါတိုင်းနှစ်လို လူငှားပြီး ထည့်နေကျ ဒီနှစ်တော့ အဲလိုမရတော့ဘူး”
ပြီးခဲ့တဲ့ ဇန်နဝါရီ ၇ ရက်က ပန်ကေတု၊ ဟမ်းငိုင်း၊ ဟိုခဲ စတဲ့ကျေးရွာအုပ်စုတွေကို အစည်းအဝေး ခေါ်ယူပြီး ပြောဆိုခဲ့တာလို့ အထက်ပါ အမျိုးသားက ပြောပါတယ်။
“ကွန်ခမ်းရွာမှာ အစည်းအဝေး ခေါ်တဲ့နေ့ မပြီးပြတ်သေးပဲ အဲဗုံးပေါက်ကွဲမှုကြောင့် ရပ်နားလိုက်ရတယ် ပြန်ခိုင်းလိုက်ရတယ်။ ပြီးတော့ အစည်းအဝေးက ထပ်ခေါ်မယ်လို့လည်း ပြောပါတယ်။ ကျနော်တို့ရွာလည်း အစည်းအဝေးကတည်းက စာရင်းကောက်ထားပြီးသားပါ။ တချို့ ကျန်းမာရေး ချို့တဲ့သူတွေက ပိုကြောက်ကြတာပေါ့” ဆိုပြီး ၎င်းက ဆက်ပြောပါတယ်။
ဒ့ါအပြင် ပန်ကေတု၊ ကုန်လိုင်း၊ မောက်လျန်အုပ်စုထဲက ရွာခံတွေကို မိုင်းရှင်းလင်းရေးလုပ်ဖို့ တစ်ရွာကို တစ်ရက် ၅ ဦးနဲ့ အလှည့်ကျ မိုင်း ရှာခိုင်းနေတယ်လို့ သိရပါတယ်။
“ရွာအလှည့်ကျ မိုင်း ရှင်းခိုင်းတာ။ ရှာခိုင်းတာမျိုးလည်း လုပ်ခိုင်းတာ ရှိတယ်။ လမ်းမဘေးမှာတို့ တောထဲ ခြံထဲတွေ ရှာရတယ်။ အဲမိုင်း ရှာခိုင်းတာလည်း ရပ်ရွာတွေက အန္တရာယ် အရမ်းများတယ်။ ဘုမသိ ဘမသိနဲ့ မိုင်းအကြောင်းလည်း တစ်စက်မှ မသိဘူး။ အခု သူတို့ အမျိုးမျိုး ဖိနှိပ်တာဗျာ”
အဆိုပါဖြစ်စဉ်နဲ့ ပတ်သက်ပြီး အသေးစိတ် အချက်အလက် သိရဖို့ SSPP တပ်ရဲ့ ပြောရေးဆိုခွင့်ရှိသူ ဗိုလ်မှူး စိုင်းဖုန်းဟန်ကို ရွှေဖီမြေက စာပို့ကာ ဆက်သွယ်ခဲ့ပေမဲ့ ပြန်လည် ဖြေကြားတာ မရှိပါဘူး။
ပြီးခဲ့တဲ့ ဇန်နဝါရီ ၆ ရက်က မောက်လျန်ရွာအနီး ပေါက်ကွဲမှုတစ်ခု ဖြစ်ပြီးနောက် ခြံထဲမှာ ရှိနေတဲ့ ခတ္တယျဆိုသူက ကြောက်လန့်ပြီး ထွက်ပြေးတာကြောင့် SSPP တပ်က လိုက်လံ ပစ်ခတ်ရာ ထိမှန်သေဆုံးသွားတဲ့ဖြစ်စဉ်လည်း ရှိခဲ့ဖူးပါတယ်။
