မိုင်းရူပ၊ ဇန်နဝါရီ ၆ ရက်၊ မိုးကုတ်
မန္တလေးတိုင်း မိုးကုတ်မြို့မှာ တော်လှန်ရေးတပ်ဖွဲ့တွေရဲ့ နာမည်နဲ့ ငွေ လိုက်လိမ်နေသူ ၉ ဦးကို ဖမ်းဆီးပြီး တအာင်းတပ်- TNLA ထံ အပ်နှံခဲ့တဲ့ ရှမ်းပြည်နယ်မြောက်ပိုင်း မဟာမိတ်တပ်ရင်း- NSSAA တပ်ဖွဲ့ဝင် ၄ ဦးကို TNLA က ဖမ်းဆီးထားတယ်လို့ သိရပါတယ်။
၂၀၂၄ ခုနှစ် ဒီဇင်ဘာ ၂၅ ရက်က မိုးကုတ်မြို့မှာ တော်လှန်ရေးအင်အားစုရဲ့ နာမည်ကို သုံးပြုပြီး ငွေ လိုက်လိမ်နေသူ ၉ ဦးကို NSSAA က ဖမ်းဆီးရမိပြီး TNLA ထံ လွှဲပြောင်းပေးခဲ့တာပဲ ဖြစ်ပါတယ်။
ငွေ လိုက်လိမ်နေသူ ၉ ဦးကို လွှဲပြောင်းပေးခဲ့တဲ့ NSSAA တပ်ဖွဲ့ဝင် ၄ ဦးကို ပြီးခဲ့တဲ့ ဒီဇင်ဘာလကုန်မှာ TNLA က ဖမ်းဆီးထားတာဖြစ်ပြီး လက်ရှိအချိန်ထိ တပ်ရင်းနဲ့ အဆက်အသွယ် ပြတ်တောက်နေတယ်လို့ NSSAA ရဲ့ ပြန်ကြားရေးတာဝန်ခံက ရွှေဖီမြေကို ပြောပါတယ်။
“TNLA က ဖမ်းထားပြီးတော့မှ ဖုန်းတွေရော သိမ်းထားတယ်။ အချုပ်ကားမှာ ထိန်းသိမ်းထားတယ်လို့ သိရတယ်။ ဖမ်းဆီးခံရတဲ့ တပ်ဖွဲ့ဝင်တွေနဲ့ ဒီဇင်ဘာ ၃၀ ရက်အထိပဲ နောက်ဆုံး အဆက်အသွယ် ရတယ်။ ဘာပြစ်မှုနဲ့ ဖမ်းဆီးထားတာလဲ မသိရဘူး”
လက်ရှိမှာ NSSAA ရဲ့ တပ်ဖွဲ့ဝင် ၄ ဦးကို TNLA ရဲ့ ရဲတပ်ဖွဲ့က ဖမ်းဆီးထားပြီး ၎င်းတို့ ၄ ဦးကို ဘာပြစ်မှုနဲ့ စွဲချက် တင်ထားလဲဆိုတာ ရှင်းရှင်းလင်းလင်း ပြောပြပေးစေချင်တယ်လို့လည်း သူက ဆက်ပြောပါတယ်။
NSSAA ရဲ့ တပ်ဖွဲ့ဝင် ၄ ဦးကို TNLA ရဲ့ရဲတပ်ဖွဲ့က ဖမ်းဆီးထားတာနဲ့ ပတ်သက်ပြီး အသေးစိတ် သိရဖို့ ရွှေဖီမြေက PSLF/TNLA ရဲ့ ပြောရေးဆိုခွင့်ရှိသူ လွေးယေဦးကို ဆက်သွယ်မေးမြန်းထားဆဲ ဖြစ်ပါတယ်။
NSSAA က ဖမ်းဆီးရမိတဲ့ ငွေကြေး လိုက်လံ လိမ်လည်နေသူ ၉ ဦးထဲမှာ ၃ ဦးက TNLA ရဲ့ ရပ်ရွာလုံခြုံရေးတပ်ဖွဲ့ထဲကဖြစ်ကြောင်း ရွှေဖီမြေက စုံစမ်းသိရှိရပါတယ်။
မိုးကုတ်မြို့ကို ပြီးခဲ့တဲ့ ၂၀၂၄ ခုနှစ် ဇူလိုင် ၂၅ ရက်မှာ TNLA နဲ့ ပူးပေါင်းတပ်က သိမ်းပိုက်နိုင်ခဲ့ပြီး လက်ရှိမှာ လေကြောင်းစိုးရိမ်ချက်ကြောင့်ဆိုပြီး TNLA က အင်တာနက်နဲ့ ဖုန်းဆက်ခွင့် ပိတ်ပင်ထားပါတယ်။
