လွေးထွေး၊ မတ်လ ၃၁ ရက်၊ မန္တလေး
ငလျင်ဒဏ်ကို အပြင်းအထန် ခံစားနေရတဲ့ မန္တလေးတိုင်းနဲ့ စစ်ကိုင်းတိုင်းက နေရာတချို့မှာ အရေးပေါ် လိုအပ်နေတဲ့ သောက်ရေသန့်ကို လိုအပ်သလောက်ဝယ်ယူလို့ မရတော့တဲ့အပြင် လီတာဝက် တစ်ဘူးကို ၂ ထောင်နဲ့ ပေးဝယ်နေရကြောင်း ပြည်ကြီးတံခွန်မြို့နေ အမျိုးသမီးရဲ့ ပြောပြချက်အရ သိရပါတယ်။
ငလျင် လှုပ်ခတ်ခဲ့တာကြောင့် လူထုအများစုရဲ့ နေအိမ်နဲ့ အခြေခံ အသုံးအဆောင်ပစ္စည်းတွေ ပြိုကျပျက်စီးခဲ့တာကြောင့် ဒေသခံတွေက လမ်းမပေါ်မှာသာ ဖြစ်သလို နေထိုင်စားသောက်နေကြရပါတယ်။
“ကျမ သိသလောက် ကျမတို့မြို့မှာ အခု ကုန်စုံဆိုင်အကြီး ၂ ဆိုင်ဘဲ ဖွင့်တာလေ။ သူတို့ကတော့ လာဝယ်တဲ့သူ အကုန်ရအောင် ရောင်းပေးပါတယ်။ ဒီနေ့ ရေသန့် ၅ ဘူးပဲ ရခဲ့တယ်။ မနက်ဖြန်ဆို မရတော့ဘူး။ ငတ်ရင်ငတ်မယ်။ မဟုတ်လည်း ရေကြမ်းကို ကျိုသောက်ရမှာဘဲ” လို့ ပြည်ကြီးတံခွန်မြို့နေ အမျိုးသမီးတစ်ဦးက ရွှေဖီမြေကို ပြောပါတယ်။
ရေသန့်အပြင် အခြေခံ စားသောက်ကုန်ဖြစ်တဲ့ အနိမ့်ဆုံး ဆန်ကြမ်း တစ်ပြည် ၅ ထောင်၊ ဆီ တစ်ပိဿာကို ၁ သောင်း ၅ ထောင်၊ ခေါက်ဆွဲခြောက် တစ်ထုပ် ၂ ထောင်နဲ့ ကြက်ဥတစ်လုံး ၁,၅၀၀ ကျပ်အထိ ပေးဝယ်နေရတယ်လို့ ဆိုပါတယ်။
အလားတူ စစ်ကိုင်းတိုင်းမှာလည်း အခြေခံစားသောက်ကုန်အပြင် ပြိုကျပျက်စီးနေတဲ့ အဆောက်အဦး ရှင်းလင်းခတွေလည်း ပေးနေရပြီး အလောင်းသယ်တဲ့ အိတ်တစ်ခုကို အနိမ့်ဆုံး ၁ သောင်းအထိ ပေးဝယ်နေရပါတယ်။
စစ်ကိုင်းကို ရောက်နေတဲ့ သီလရှင်တစ်ပါးက “ကုန်ဈေးနှုန်း အကုန်လုံးတော့ မသိဘူး။ အခုလောလောဆယ် လိုနေတဲ့ ရေတို့ စားစရာတို့ကတော့ ဈေးအရမ်းတက်တယ်” လို့ ရွှေဖီမြေသို့ မိန့်ပါတယ်။
ဒါ့အပြင် တံတားဦးမြို့မှာလည်း ပြိုကျပျက်စီးနေတဲ့ အဆောက်အဦး ရှင်းလင်းခကို သက်ဆိုင်ရာက ကျပ်သိန်း ၄၀၀ အထိ တောင်းခံတာကြောင့် အခက်အခဲ ဖြစ်နေကြတယ်လို့ နောက်ထပ် အမျိုးသားတစ်ဦးက ပြောပါတယ်။
မန္တလေးနဲ့ စစ်ကိုင်းက နေရာတချို့မှာ ပြည်တွင်းပြည်ပ ကူညီကယ်ဆယ်ရေးအဖွဲ့တွေ ရောက်နေပေမဲ့ ကျန်တဲ့ နေရာတချို့မှာတော့ ဘယ်ကယ်ဆယ်ရေးအဖွဲ့မှ မရောက်သေးသလို ဘာအကူအညီမှလည်း မရကြသေးကြောင်း ဒေသခံတွေရဲ့ ပြောပြချက်အရ သိရပါတယ်။
နေရာတချို့မှာ စစ်ကောင်စီတပ်က ကယ်ဆယ်ရေး ပေးမလုပ်တဲ့အပြင် စစ်ဆေးမေးမြန်းတာတွေလည်း ရှိနေတာကြောင့် ဒီနေ့အထိ ကယ်ဆယ်ရေးလုပ်ငန်းတွေ မလုပ်နိုင်ကြသေးပါဘူး။
