ရွှေဖီမြေ၊ ဖေဖော်ဝါရီ ၃ ရက်
မကွေးနဲ့စစ်ကိုင်းတိုင်းမှာ စစ်ကောင်စီတပ်က လေကြောင်းကနေ ဗုံးကြဲမှုအပြင် စက်တပ် လေထီးနဲ့ပါ ဗုံးကြဲမှု ပိုမိုပြုလုပ်လာနိုင်လို့ သတိထားကြဖို့ မြေပြင်ရှိ တော်လှန်ရေးအဖွဲ့အစည်းတွေက ပြောဆိုနေကြပါတယ်။
စက်တပ်လေထီး (Paramotor)ဟာ တစ်နာရီကို ပျှမ်းမျှ ၆၃ မိုင်အထိ ပျံသန်းနိုင်သလို မိုင်ပေါင်း ၃၀ ကနေ ၉၀ အထိ ပျံသန်းသွားလာနိုင်တဲ့အတွက် ပျံသန်းနိုင်ချိန် ၃ နာရီကနေ ၄ နာရီအထိ ရှိတယ်လို့ ဆိုပါတယ်။
“အခုက လောင်စာဆီ အခက်အခဲကြောင့် စက်တပ် လေထီးကို ပိုအသုံးပြုတဲ့သဘောလား မသိဘူး။ ဒီကောင်ရဲ့ ထိရောက်မှုက အထိုက်အလျောက် ရှိတယ်။ အဓိကတော့ စစ်ရေး ပစ်မှတ်တွေကို ဗုံးကြဲတာ။ သာမန်လူတွေရဲ့ နေအိမ်တွေကို ထိတာလည်း ရှိတယ်” လို့ စစ်ကိုင်းတိုင်းရှိ တော်လှန်ရေးသမားတစ်ဦးက ပြောပါတယ်။
စက်တပ် လေထီးတွေဟာ လေယာဉ်ပေါ်ကနေ ချပေးတာမျိုးတင် မဟုတ်ဘဲ မြေပြင်ကနေလည်း ပျံတက်သွားနိုင်တဲ့ အမျိုးအစား ဖြစ်တယ်လို့ ဆိုပါတယ်။
မနေ့ ဇန်နဝါရီ ၂ ရက်မှာလည်း မုံရွာမြို့ရှိ အနောက်မြောက်ပိုင်း တိုင်းစစ်ဌာနချုပ်ထဲ ထောက်ပို့လေယာဉ်နဲ့ ဗုံးကြဲမယ့် စက်တပ်လေထီးတွေကို ချသွားခဲ့ပြီး အရေအတွက်ကိုတော့ မသိရသေးဘူးလို့ ဆိုပါတယ်။
“အဲကောင်ကိုပစ်ရင် ငါးကျင်းမီးကတော့ မမှီနိုင်ဘူး။ ပွိုင့် ၅ သေနတ်လောက်မှ မှီနိုင်မယ်” လို့ သူက ဆက်ပြောပါတယ်။
အဲဒီစက်တပ် လေထီးကနေ စစ်တပ်က ဗုံး ကြဲချရာမှာ မီးလောင်ဗုံးလည်း ပါဝင်ပြီး လူထုတွေအနေနဲ့ သတိထားကြဖို့ တော်လှန်ရေးအဖွဲ့တွေက ပြောဆိုထားပါတယ်။
မကွေးနဲ့ စစ်ကိုင်းတိုင်းရှိ တော်လှန်ရေး အဖွဲ့အစည်းတွေဟာ ကျေးရွာအများစုကို ထိန်းချုပ်ထားနိုင်ပေမဲ့ လက်နက် အခက်အခဲကြောင့် ခံစစ်အနေအထားမှာပဲ စစ်တပ်ကို တိုက်ခိုက်နေကြတာ ဖြစ်ပါတယ်။
