ပျားကြီး၊ ဇန်နဝါရီ ၂၃ ရက်၊ မတ္တရာ
မတ္တရာမြို့နယ်မြောက်ဖက်ခြမ်း ထန်းပင်ကုန်းနဲ့ ကင်းရွာကို စစ်ကောင်စီတပ်က ပစ်မှတ်ထားပြီး လက်နက်ကြီးနဲ့ ပစ်ခတ်တိုက်ခိုက်မှု ဆက်တိုက် ပြုလုပ်နေတယ်လို့ဒေသခံတွေက ပြောပါတယ်။
ဇန်နဝါရီ ၂၁ ရက် ညနေပိုင်းနဲ့ ဇန်နဝါရီ ၂၂ ရက် မနက်အစောပိုင်းကစပြီး လက်နက်ကြီး ပစ်ခတ်မှုကို နေရာအနှံ့ကနေလုပ်ဆောင်နေတာဖြစ်ပြီး ကျေးရွာထဲအထိ ကျရောက်ပေါက်ကွဲမှု ရှိနေတာ ဖြစ်ပါတယ်။
“လူထိခိုက်တာတော့ မကြားရသေးဘူး။ ရွာတွေမှာက လူသိပ်မရှိတော့ဘူးလေ။ အိမ်တွေပေါ်တည့်တည့် ကျတာ။ လူရှိနေရင်တော့ မလွယ်ဘူး။ တစ်နေကုန် ပစ်နေတာ” လို့ ထန်းပင်ကုန်းရွာခံတစ်ဦးက ပြောပါတယ်။
စစ်တပ်က ၈၀ မမနဲ့ ၁၂၀ မမ ပါဝင်တဲ့ လက်နက်ကြီး ပစ်ခတ်မှုကို မတ္တရာနဲ့ မန္တလေးတိုင်း ပုသိမ်ကြီး စတဲ့မြို့နယ်တွေမှာရှိတဲ့ အထိုင်ချ တပ်စွဲထားတဲ့ နေရာပေါင်း ၁၀ နေရာထက်မနည်းကနေ ပစ်ခတ်နေတာလို့ ဒေသခံတွေက ပြောဆိုပါတယ်။
ဇန်နဝါရီ ၂၁ ရက် ညနေပိုင်းမှာလည်း လက်နက်ကြီး ပစ်ခတ်မှုပေါင်း ၁၅ ကြိမ်ထက်မနည်း ရှိခဲ့ပြီး မနေ့ ဇန်နဝါရီ ၂၂ ရက် မနက်အစောပိုင်းကနေ ညနေပိုင်းအထိ အကြိမ်ပေါင်း ၃၀ ကျော် ပစ်ခတ်တိုက်ခိုက်ခဲ့တယ်လို့ စစ်ဘေးရှောင် ကူညီပေးနေသူတစ်ဦးက အတည်ပြု ပြောဆိုပါတယ်။
ဒါ့အပြင် မနေ့မှာပဲ မတ္တရာမြို့နယ်အနောက်ခြမ်းကို စစ်တပ်က အင်အားအလုံးအရင်းနဲ့ စစ်ကြောင်းထိုးနေပြီး မြွေသစ်တောရုံးနဲ့ မြွေဥဒိန်ရွာက နေအိမ်တွေကို မီးရှို့ဖျက်ဆီးနေတယ်လို့ ဒေသခံတွေက ပြောပါတယ်။
မနေ့မနက်ပိုင်းကစပြီး ပြည်သူ့ကာကွယ်ရေး တပ်မတော် (မန္တလေး)နဲ့ စစ်တပ်တို့အကြား ထန်းပင်ကုန်းရွာအနီးဝန်းကျင်မှာ တိုက်ပွဲ ဖြစ်ပွားနေပြီး စစ်ကောင်စီတပ်ဖက်က စစ်အင်အား ဖြည့်တင်းမှု အလုံးအရင်းနဲ့ ပြုလုပ်နေတယ်လို့ ပြည်သူ့ကာကွယ်ရေး တပ်မတော် (မန္တလေး)က မနေ့ညနေပိုင်းမှာ ထုတ်ပြန်တာကို တွေ့ရပါတယ်။
