ရွှေဖီမြေ၊ ဩဂုတ် ၅ ရက်
စစ်ကောင်စီတပ်ရဲ့ လေကြောင်း တိုက်ခိုက်မှုနဲ့ လက်နက်ကြီး ပစ်ခတ်မှုကြောင့် ဇူလိုင်လ ၁ ရက်ကနေ ဇူလိုင်လ ၃၁ ရက်နေ့အထိ တစ်လအတွင်း အမျိုးသမီး ၆၄ ဦး သေဆုံးခဲ့ပြီး ၈ဝ ဦး ထိခိုက်ဒဏ်ရာရခဲ့တယ်လို့ ဆိုပါတယ်။
စစ်ကောင်စီတပ်ဟာ လေကြောင်းသုံး တိုက်ခိုက်မှုကို အရင်လထက် ပိုမို အသုံးပြုလာတာကြောင့် နိုင်ငံအနှံ့က အမျိုးသမီးပေါင်း ၆၄ ဦး သေဆုံးခဲ့ကြောင်း မြန်မာ့အမျိုးသမီးသမဂ္ဂ-BWU ရဲ့ အမျိုးသမီးမှတ်တမ်းနဲ့ သုသေတနလုပ်ငန်းစဉ်ကနေ လစဉ် ထုတ်ပြန်တဲ့ အမျိုးသမီးဆိုင်ရာ အချက်အလက်မှာ ဖော်ပြထားပါတယ်။
သေဆုံးသူတွေထဲမှာ ၅၂ ဦးက လေကြောင်းသုံး တိုက်ခိုက်မှုကြောင့် သေဆုံးခဲ့ပြီး လက်နက်ကြီးကြောင့် ၁၁ ဦးနဲ့ အကျဉ်းထောင်မှာ ဆေးကုသခွင့်မရလို့ သေဆုံးသူ ၁ ဦး ရှိခဲ့တယ်လို့ ဆိုပါတယ်။
ဒါအပြင် ဒဏ်ရာရတဲ့ သူတွေဟာ လေကြောင်းနဲ့ ဗုံးကြဲတိုက်ခိုက်မှုကြောင့် ၆၇ ဦး၊ လက်နက်ကြီးပစ်ခတ်မှုကြောင့် ၉ ဦး၊ မြေမြှုပ်မိုင်းကြောင့် ၂ ဦးနဲ့ လက်နက်ကိုင်ပဋိပက္ခဖြစ်ပွားတဲ့နေရာတွေမှာ လိင်ပိုင်းဆိုင်ရာ အကြမ်းဖက်ခံရသူ ၅ ဦးအထိ ရှိခဲ့တယ်လို့ ထုတ်ပြန်ချက်ထဲမှာ ဖော်ပြထားပါတယ်။
သေဆုံးသူ အမျိုးသမီးတွေဟာ ကရင်ပြည်နယ်က ၁ ဦး၊ မွန်ပြည်နယ်က ၂ ဦး၊ ကချင်ပြည်နယ်က ၂ ဦး၊ ရှမ်းပြည်နယ်က ၄ ဦး၊ ကရင်နီပြည်နယ်က ၉ ဦးနဲ့၊ ပဲခူးတိုင်းက ၁ ဦး၊ မကွေးတိုင်း ၃ ဦး၊ မန္တလေးတိုင်းက ၉ ဦး၊ ရန်ကုန်တိုင်းက ၁ ဦးနဲ့ တနင်္သာရီတိုင်း ၄ ဦး၊ စစ်ကိုင်းတိုင်းက ၂၈ ဦးဖြစ်ပြီး ဒဏ်ရာရသူ ၈၀ ဦး ရှိခဲ့ကြောင်း ဆက်လက် ဖော်ပြထားပါတယ်။
ပြီးခဲ့တဲ့ မေလ တစ်လအတွင်းမှာလည်း စစ်ကောင်စီတပ်ရဲ့ လေကြောင်း တိုက်ခိုက်မှုနဲ့ လက်နက်ကြီး ပစ်ခတ်မှုကြောင့် အမျိုးသမီး ၉၂ ဦး သေဆုံးခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
