လွေးလာဝ်ဇာရ်၊ ဖေဖော်ဝါရီ ၁၁ ရက်၊ ဟိုပန်
ရှမ်းမြောက် ဟိုပန်မြို့ ရုံးကုန်းရပ်ကွက်မြို့မဘောလုံးကွင်းအနီးမှာရှိတဲ့ ဒေသခံတွေရဲ့ မြေကွက်နဲ့ ရာဘာခြံကို “ဝ”ပြည်သွေးစည်းညီညွတ်ရေး တပ်မတော်- UWSA က သိမ်းယူပြီး မြေကွက်မှာ ရှိထားတဲ့ ရာဘာပင်ကိုလည်း ခုတ်သွားခဲ့တယ်လို့ ကာယကံရှင်တွေရဲ့ ပြောပြချက်အရ သိရပါတယ်။
UWSA သိမ်းယူထားတဲ့ အဲဒီ အိမ်ထောင်စု ၈ စုရဲ့ မြေကွက်ကို အစိုးရရုံး ဆောက်ဖို့အတွက် သိမ်းထားတာဖြစ်ပြီး ညှိနှိုင်းမှု မပြီးသေးဘဲ ဒေသခံတွေရဲ့ ရာဘာပင်ကို ခုတ်ယူသွားခဲ့တာလို့ ဆိုပါတယ်။
“ဝ အစိုးရက ကျမတို့ အိမ်ထောင်စု ၈ ခုရဲ့မြေတွေကို အစိုးရရုံး ဆောက်ဖို့ဆိုပြီး ခေါ်ညှိပါတယ်။ ကျမတို့ကို ၁၄၃ မှာ မြေကွက် ပြပါတယ်။ ကျမတို့လည်း သဘောမကျလို့ ပြန်တောင်းဆိုတယ်။ ကျမတို့ခြံက ၆.၅ မူကျော် ရှိပါတယ်။ ရာဘာပင်ပေါင်း ၄၂၀ ရှိပါတယ်။ ဝင်ငွေ အားကိုးအားထားစရာဆိုလို့ ဒီအပင်ဘဲ ရှိပါတယ်။ ညှိနှိုင်းမှု မပြီးသေးဘဲ အပင်တွေ ခုတ်ပစ်တယ်။ ပြေပြေလည်လည် ညှိနှိုင်းမယ်ဆိုရင် ကျမတို့က အဆင်သင့် ရှိပါတယ်” လို့ ခြံရှင်အမျိုးသမီးတစ်ဦးက ပြောပါတယ်။
လက်ရှိ သိမ်းထားတဲ့ မြေကွက်တွေဟာ အိမ်ဆောက်ထားသူရှိသလို ဆောက်လက်စ အိမ်တွေလည်း ရှိတယ်လို့ နောက်ထပ် ဒေသခံတစ်ဦးက ပြောပါတယ်။
“အဲမှာဆို နေတဲ့သူတွေလည်း ရှိပြီ။ ဆောက်လက်စအိမ်နဲ့ အုတ်တံတိုင်း ကာထားတဲ့သူတွေလည်း ရှိတယ်။ ရာဘာခြံ လုပ်စားတဲ့သူတွေလည်း နှစ်ပေါင်းမနည်းတော့ဘူး။ အစားထိုးမြေ ပေးမယ်တဲ့။ သူတို့ပေးတဲ့မြေက စစ်တပ်ပိုင်မြေ ဂျောင်ကလောင်ကျတဲ့တော လူသူမရှိတဲ့နေရာမှာ သရဲတစေ ရှိတယ်လို့တောင် အောက်မေ့ရတယ်။ သူတို့ပြတဲ့နေရာက ဘယ်လိုမှ အဆင်မပြေဘူး။ သူတို့ရုံးကို သွားညှိတယ်။ သူတို့ပေးတဲ့ဟာယူ မယူရင် ဘာမှရမှာမဟုတ်ဘူးဆိုတဲ့သဘော”
အခုလို လုပ်ရပ်က မြေကွက် သိမ်းခံရတဲ့ ဒေသခံတွေအတွက် အခက်အခဲ ဖြစ်စေတယ်လို့ နောက်ထပ် ဒေသခံတစ်ဦးက ဆက်ပြောပါတယ်။
“ဖြစ်စေချင်တာက ကိုယ့်မြေကွက် ကိုယ့်ခြံဘဲ လိုချင်တာပေါ့။ မရတဲ့အဆုံး သူတို့ရုံးကိုဆောက်မယ်ဆိုတော့ ကျမတို့ကို တန်ရာတန်ကြေး ပေးစေချင်တယ်။ နေရာအစားထိုး ပေးမယ်ဆိုလည်း နေရာကောင်းကောင်း ပြန်ပေးစေချင်တယ်။ ကျမတို့ဟာလည်း နေရာကောင်းတယ်”
ခုတ်သွားတဲ့ ရာဘာတွေဟာ လွန်ခဲ့တဲ့ ၂၀၁၆ ခုနှစ်ကတည်းက စိုက်ထားခဲ့တဲ့ ရာဘာပင် ဖြစ်တယ်လို့ ၎င်းက ပြောပါတယ်။
ဟိုပန်မြို့နယ်ကို ၁၀၂၇ စစ်ဆင်ရေးအတွင်း ညီနောင်မဟာမိတ် ၃ ဖွဲ့က ပြီးခဲ့တဲ့ ၂၀၂၄ ခုနှစ် ဇန်နဝါရီ ၅ ရက်မှာ သိမ်းယူခဲ့ပြီးနောက် ဇန်နဝါရီ ၁၀ ရက်မှာ ညီနောင်မဟာမိတ် ၃ ဖွဲ့က UWSA လက်ထဲ လွှဲပြောင်းပေးခဲ့တာပဲ ဖြစ်ပါတယ်။
အဆိုပါဖြစ်စဉ်နဲ့ ပတ်သက်ပြီး အသေးစိတ် အချက်အလက် သိရဖို့ UWSA ရဲ့ ပြောရေးဆိုခွင့်ရှိသူ ဦးညီရမ်းကို ရွှေဖီမြေက ဖုန်းနဲ့ဆက်သွယ်ပေမဲ့ ဆက်သွယ်လို့ မရခဲ့ပါဘူး။
