ရွှေဖီမြေ၊ ဖေဖော်ဝါရီ ၂၆ ရက်၊ ချောင်းဦး
စစ်ကိုင်းတိုင်း ချောင်းဦးမြို့နယ်မှာ စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ကလေးအပါအဝင် အရပ်သား ၆ ဦးထက်မနည်း သေဆုံးခဲ့တယ်လို့ ချောင်းဦး PDF ရဲ့ တာဝန်ရှိသူတစ်ဦးက ရွှေဖီမြေကို ပြောပါတယ်။
မနေ့ ဖေဖော်ဝါရီ ၂၅ ရက် နေ့လယ် ၁၂ နာရီဝန်းကျင်မှာ ချောင်းဦးမြို့နယ် နွယ်ခွေနဲ့ချောင်းမရွာကို စစ်တပ်က စက်တပ်လေထီးအပြင် ဂျက်ဖိုက်တာနဲ့ တိုက်ခိုက်ခဲ့တာလို့ ပြောပါတယ်။
“ချောင်းမရွာကို စစ်ကြောင်း ဝင်လာတယ်။ စစ်ကြောင်း ဝင်ထိုးမှုကြောင့် ပြည်သူ ၆ ဦးထက်မနည်း သေဆုံးတယ်။ ၆ ဦးထက်မနည်း သေဆုံးတာကလည်း သူတို့ရွာမှာ ဦးတည် လာချတယ်။ တချို့လူတွေဆို အလောင်းပါ ပျောက်သွားတယ်။ အခုလက်ရှိ နယ်မြေရှင်းလင်းမှုလည်း ဖြစ်တယ်။ ပြည်သူတွေလည်း ရှောင်နေတဲ့အတွက်ကြောင့်မို့ အတိအကျ မသိရသေးဘူး”
လေကြောင်းကနေ ပစ်ခတ်တိုက်ခိုက်ခံရတဲ့ နွယ်ခွေနဲ့ ချောင်းမရွာက ဒေသခံနေအိမ်တွေဟာ ထိခိုက်ပျက်စီးသလို နယ်မြေရှင်းလင်းရေး လုပ်နေဆဲဖြစ်လို့ သေဆုံးသူနဲ့ ထိခိုက်ဒဏ်ရာရသူ အတိအကျကိုတော့ အတည်မပြုနိုင်သေးဘူးလို့ သူက ဆက်ပြောပါတယ်။
“ပကဖတစ်ယောက် ပါတယ်။ ကျန်တာအရပ်သားတွေချည်းပဲပေါ့။ ရင်ခွင်ပိုက်အရွယ်ကလေးတစ်ယောက်လည်း သေတဲ့အထဲ ပါတယ်ဗျ။ ဒဏ်ရာ ပြင်းပြင်းထန်ထန်ရထားတဲ့သူတွေလည်း ရှိတယ်” လို့ နွယ်ခွေရွာခံတစ်ဦးက ပြောပါတယ်။
ဖေဖော်ဝါရီ ၂၆ ရက် မနက်ပိုင်းမှာလည်း မုံရွာမြို့နယ်ထဲက ဗောဓိတထောင် တာဝါတိုင်ကုန်းကို စစ်တပ်က လေကြောင်းနဲ့ တိုက်ခိုက်ခဲ့တယ်လို့ ဒေသခံတစ်ဦးက ပြောပါတယ်။
ပြီးခဲ့တဲ့ ဖေဖော်ဝါရီ ၁၈ ရက်က ချောင်းဦးမြို့နယ် ကျီးကုန်းရွာကို စစ်တပ်က ပစ်ခတ်တဲ့ လက်နက်ကြီး ကျရောက် ပေါက်ကွဲမှုကြောင့် အရပ်သား ၂ ဦး သေဆုံးပြီး ကလေးတစ်ဦးအပါအဝင် အရပ်သား ၃ ဦး ထိခိုက်ဒဏ်ရာ ရရှိခဲ့ပါတယ်။
