အင်းငယ်၊ ဖေဖော်ဝါရီ ၂၈ ရက်၊ ဒီးမော့ဆို
ကရင်နီပြည် ဒီးမော့ဆိုမြို့နယ် ပန်ပက်ကျေးရွာအုပ်စု ချောင်းတိန်းရွာမှာ ရိက္ခာပြတ်လပ်လာတာကြောင့် စစ်ဘေးရှောင်တွေ ခရုကောက် ရောင်းနေရတယ်လို့ ထောက်ပို့အဖွဲ့အစည်း တာဝန်ရှိသူတွေက ပြောပါတယ်။
ချောင်းတိန်းရွာဟာ လမ်းပန်းဆက်သွယ်ရေး အခက်အခဲကြောင့် အလှူရှင် မရောက်တာ ၅ လခန့် ကြာပြီဖြစ်သလို သွားရတဲ့ လမ်းတစ်လျှောက်မှာလည်း ထိတွေ့တိုက်ပွဲ ဖြစ်နေတာကြောင့် ဒေသတွင်း ကူညီတဲ့ အဖွဲ့အစည်းလည်း သွားရောက်ဖို့ ခက်ခဲနေတယ်လို့ ဆိုပါတယ်။
ဒေသတွင်း ကူညီဆောင်ရွက်ပေးနေသူ CDM ကျောင်းဆရာမ မမီးမီးက “ဒီဖက်မှာ စစ်ဘေးရှောင်တွေ အရမ်းများတော့ သူတို့တွေက ခက်ခဲလာတာပေါ့။ ဒီးမော့ဆိုထဲက ၄ မိုင်တို့၊ လယ်ကွင်းတွေမှာ ခရုကောက်ပြီး ပြန်လာရောင်းကြတယ်။ နို့ဆီဘူး တစ်ခွက်ကို တစ်ထောင် နှစ်ထောင် အဲလို ရောင်းကြတယ်” လို့ ပြောပါတယ်။
ချောင်းတိန်းရွာဘက် သွားရောက်တဲ့ လမ်းတစ်လျှောက်မှာ မိုင်းတွေ ထောင်ထားပြီး နေ့စဉ်ရက်ဆက် လက်နက်ကြီး ပစ်ခတ်နေပေမဲ့လည်း စစ်ဘေးရှောင်တွေက စားဝတ်နေရေးအတွက် အရဲစွန့်ကာ လာရောက် ရောင်းချနေကြတယ်လို့ သိရပါတယ်။
ဒါ့အပြင် အချို့စစ်ဘေးရှောင်က ဟင်းရွက် ခူးရောင်းတာ၊ တောင်ယာအလုပ်မှာ နေ့စားလိုက်တာတွေ ဝင်ရောက် လုပ်ကိုင်နေရပြီး မတန်တဆ လုပ်အားခ ခေါင်းပုံဖြတ်တာတွေ ကြုံတွေ့နေရတယ်လို့ ဆိုပါတယ်။
အသက် ၆၀ အရွယ် စစ်ဘေးရှောင် အမျိုးသမီးတစ်ဦးက “ဆီနဲ့အသားဆို ဝယ်မစားနိုင်တာ ကြာပြီ။ နေ့စား လိုက်တာလည်း တစ်လမှာ ၂ ရက်လောက်ပဲ ရတော့ မကာမိဘူးလေ။ ကျမတို့ဖက်က လက်နက်ကြီးကျတာ မရှိပေမဲ့ ဝေးလို့ ဘယ်သူမှ မရောက်ဘူး။ ဂရုဏာတို့ ဘာတို့ ဘာမှမလာဘူး” လို့ ပြောပါတယ်။
ချောင်းတိန်ရွာမှာ စစ်ဘေးရှောင် ၁၅၀ ခန့်နေထိုင်ကြပြီး လက်ရှိ စားနပ်ရိက္ခာနဲ့ သောက်သုံးရေ အရေးပေါ် လိုအပ်ပြီး ကိုယ်ထူကိုယ်ထ ကျောင်းတွေအတွက် စာရေးကိရိယာတွေလည်း ထောက်ပံ့ပေးစေချင်တယ်လို့ ကျောင်းကော်မတီဝင်တွေက ပြောပါတယ်။
၂၀၂၅ ခုနှစ်အတွင်း ရှမ်းတောင်မှာ ခိုလှုံနေတဲ့ စစ်ဘေးရှောင်တွေကို စစ်ကောင်စီက ဖိအားပေးကာ နေရပ်သို့ ပြန်ခိုင်းထားတာကြောင့် ကရင်နီပြည်မှာ လူဦးရေ တဖြည်းဖြည်း တိုးလာပြီး အလုပ်ကိုင်ရှားပါးတာနဲ့အမျှ စားဝတ်နေရေး ရုန်းကန်လာရတယ်လို့ စုံစမ်းသိရှိရပါတယ်။
