လွေးထွေး၊ ဇန်နဝါရီ ၂၆ ရက်
၂၀၂၄ ခုနှစ်အတွင်း KNU ဒေသမှာ စစ်ကောင်စီတပ်နဲ့ KNLA ပူးပေါင်းတပ်တို့ တိုက်ပွဲပေါင်း ၃,၂၂၉ ကြိမ် ဖြစ်ပွားခဲ့ပြီး စစ်သား ၃,၁၃၆ ဦး သေဆုံးခဲ့ပြီးတော့ ၂,၂၂၅ ဦး ဒဏ်ရာ ရခဲ့တယ်လို့ ကရင်အမျိုးသားအစည်းအရုံး- KNU/KNLA က ဇန်နဝါရီ ၂၄ ရက်မှာ ထုတ်ပြန်ထားပါတယ်။
ဗျူဟာမှူးအဆင့်အပါအဝင် ရာနဲ့ချီတဲ့ စစ်ကောင်စီတပ်ဖွဲ့ဝင်တွေကိုလည်း ဖမ်းဆီးထိန်းသိမ်းနိုင်ခဲ့တယ်လို့ ဆိုပါတယ်။
KNU ရဲ့ ပြောရေးဆိုခွင့်ရှိသူ ပဒိုစောတောနီးက “ကျနော်တို့ လှုပ်ရှားနယ်မြေတွေမှာ ဗမာစစ်တပ်တွေ ထိန်းချုပ်နေရာက နည်းပါးသွားပါပြီ။ အကုန်လုံးက KNU ဘဲ နေရာချထားပါတယ်။ မြို့မသိမ်းတာ တစ်ခုပါဘဲ။ ကျေးရွာပိုင်းတွေမှာ ကျနော်တို့ အကုန်ပေါက်ရောက်ကုန်ပြီ။ ဒါတွေကတော့ ထူးခြားမှုပါဘဲ” လို့ ပြောပါတယ်။
ဒါ့အပြင် KNLA အပါအဝင် တော်လှန်ရေးပူးပေါင်းတပ်ဘက်က ၁၀၀ ခန့် ကျဆုံးခဲ့ကြောင်း ဖော်ပြထားပါတယ်။
စစ်တပ်အာဏာသိမ်းပြီးနောက် စစ်တပ်ရဲ့ ဗျူဟာအပါအဝင် တပ်ရင်းဌာနချုပ်နဲ့ တပ်စခန်းကြီးငယ်ပေါင်း ၁၄၀ ကျော်ကိုလည်း KNLA နဲ့ ပူးပေါင်းတပ်က သိမ်းပိုက်နိုင်ခဲ့တယ်လို့ ဆိုပါတယ်။
၂၀၂၅ ခုနှစ်အတွင်းလည်း စစ်ရေးအရှိန် မြှင့်တင်သွားမယ်လို့လည်း KNU က ပြောဆိုထားပါတယ်။
