မိုင်းဖိူမ်းဆငဲ၊ နိုဝင်ဘာ ၃ ရက်၊ နမ့်ခမ်း
တအာင်းတပ်မတော်- PSLF/TNLA ထိန်းချုပ်ထားတဲ့ နမ့်ခမ်းမြို့နယ်မှာ လူဝင်မှုကြီးကြပ်ရေးဌာန (လဝက)က နိုင်ငံခြားသားတွေအတွက်ပါ နေထိုင်ခွင့်ကဒ်ပြား လုပ်ဆောင်ပေးနေတယ်လို့ သိရပါတယ်။
တရုတ်-မြန်မာနယ်စပ်မှာရှိတဲ့ နမ့်ခမ်းမြို့မှာ ဒေသခံတွေအတွက် ဒေသခံကဒ်ပြား၊ နိုင်ငံခြားသားအတွက် နေထိုင်ခွင့်ကတ်ပြား၊ နယ်စပ်ဖြတ်သန်းခွင့်ကဒ်ပြားတွေကို ပြီးခဲ့တဲ့ အောက်တိုဘာလအတွင်း စတင်လုပ်ဆောင်ပေးနေတယ်လို့ လဝကနဲ့ နီးစပ်သူတစ်ဦးက ပြောပါတယ်။
“အခုလောလောဆယ် ဒီပြည်နယ်သား ကဒ်ပြားရယ်၊ နေထိုင်ခွင့် ကဒ်ပြားရယ်၊ အခြားပြည်နယ်သား ကဒ်ပြားရယ်ပေါ့နော်။ ဖြတ်သန်းသွားလာခွင့် ကဒ်ပြားတော့ ကဒ်နဲ့မဟုတ်ဘူး ဒီအတိုင်း စာရွက်နဲ့ဘဲ”
နေထိုင်ခွင့်ကဒ်ပြားကို ၃ လ၊ ၆ လ သက်တမ်းအဖြစ် ပြုလုပ်ပေးနေပြီး အဲဒီကဒ်ပြားနဲ့ ဒေသတွင်း လွတ်လပ်စွာ သွားလာနိုင်တယ်လို့ သူက ပြောဆိုပါတယ်။
ဖြတ်သန်းသွားလာခွင့် ကဒ်ပြားကိုတော့ ၆ ရက်သက်တမ်းနဲ့သာ ပြုလုပ်ပေးနေပြီး အဲဒီကဒ်ပြားနဲ့ သတ်မှတ်ထားတဲ့ နေရာထက် ကျော်လွန်ပြီး သွားလာလို့ မရကြောင်း ၎င်းက ဆက်ပြောပါတယ်။
“အဲကဒ်က ငါတို့နယ်ထဲမှာဆိုရင် သူလာလျှောက်တဲ့အချိန် သူဘယ်မြို့နယ်ကို သွားချင်လဲဆိုတာက ရှိသေးတယ်။ အဲကဒ်ပြားပေါ်မှာပါတဲ့ သူသွားမယ့်နေရာထက် ကျော်ပြီး သွားရင်တော့ အရေးယူနိုင်တယ်ပေါ့နော်”
နမ့်ခမ်းမြို့ဟာ တရုတ်-မြန်မာနယ်စပ်မှာတည်ရှိတဲ့ မြို့တစ်မြို့ဖြစ်ပြီး တရုတ်လုပ်ငန်းရှင်နဲ့ တရုတ်လုပ်သားတွေ ဝင်ထွက်သွားလာမှု များတဲ့မြို့ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
