မြတ်နိုး၊ ဧပြီ ၁၂ ရက်၊ ဖားကန့်
ကချင်ပြည်နယ် တနိုင်း-လီဒိုလမ်းမပေါ်ရှိ ဖားကန့်မြို့နယ် လဝါးရွာက စစ်ဘေးရှောင် ၅ဝဝ ကျော်အတွက် အရေးပေါ် ဆေးဝါးနဲ့ အစားအသောက် လိုအပ်နေကြောင်း ဒေသခံတွေဆီက သိရပါတယ်။
“လဝါးရွာကို ဗုံးကြဲတိုက်ခိုက်ခံရတယ်။ တစ်ရွာလုံး ဒုက္ခရောက်နေတယ်။ ဖုန်း၊ အင်တာနက်လိုင်းတွေ မရဘူး။ အရေးပေါ် ဆေးဝါးတွေ လိုတယ်။ စားစရာတွေ လိုတယ်။ မိသားစုတွေ တကွဲတပြား ပြေးခဲ့ရတယ်။ အဆက်အသွယ်လည်း မရဘူး” လို့ ဒေသခံ အမျိုးသမီးတစ်ဦးက ပြောပါတယ်။
တိုက်ပွဲကြောင့် တောတွေထဲ တိမ်းရှောင်နေကြရသူတချို့ ပိတ်မိနေပြီး ပိတ်မိနေတဲ့ ဒေသခံတွေအတွက် ဆေးဝါးနဲ့ အစားအသောက် အရေးပေါ် အကူအညီ လိုအပ်နေတယ်လို့ သူက ပြောပါတယ်။
နမ္မတီးဘက် ထွက်ပြေးလာတဲ့ စစ်ဘေးရှောင်တွေလည်း ဆေးဝါး အရေးပေါ် အကူအညီ လိုအပ်နေတယ်လို့ နမ္မတီး ဒေသခံတစ်ဦးက ပြောပါတယ်။
“ဒီဘက် ရှောင်လာတဲ့ စစ်ရှောင်တွေ အိုမင်းမစွမ်း သက်ကြီးရွယ်အိုတွေ၊ လေဖြတ်သူတွေ၊ နာမကျန်းသူတွေကိုပဲ လာပို့ထားသေးတာ။ ထွက်ပြေးနိုင်တဲ့ သန်သန်မာမာ လူတွေက လဝါးဘက်မှာ ကျန်နေခဲ့သေးတယ်”
နမ္မတီးမြို့မှာတော့ လဝါး၊ နန့်ယား၊ နောင်းမီ အဲဒီတစ်ဝိုက်က ဒေသခံတွေ ရှောင်လာကြပြီး မိုးကောင်းဘက်လည်း တိမ်းရှောင်သူတွေ ရှိတယ်လို့ သိရကြောင်း သူက ဆက်ပြောပါတယ်။
ပြီးခဲ့တဲ့ ဧပြီ ၁ ရက် ညနေ ၄ နာရီခန့်က လဝါးရွာကို ဗုံးကြဲတိုက်ခိုက်ခဲ့လို့ လဝါး စာသင်ကျောင်း ဘောလုံးကွင်းမှာ ဗုံး ၂ လုံး ကျကွဲကာ ကျောင်းဆောင်တွေ ထိခိုက်ပျက်စီးသွားကာ နွားတချို့ သေဆုံးခဲ့တယ်လို့ ဆိုပါတယ်။
လဝါးရွာနဲ့ အနီးတစ်ဝိုက်မှာ ပြီးခဲ့တဲ့ မတ်လကုန်ပိုင်းကတည်းကနေ လက်ရှိအချိန်ထိ စစ်ရေး တင်းမာနေပြီး တိုက်ပွဲ ဖြစ်ပွားနေသလို စစ်တပ်ဘက်ကလည်း လေကြောင်းနဲ့ တိုက်ခိုက်ခဲ့တာပဲ ဖြစ်ပါတယ်။
စစ်ကောင်စီဘက်က ရက် ၂၀ ကြာ အပစ်အခတ် ရပ်စဲကြောင်း ထုတ်ပြန်ထားပေမဲ့ တိုင်းရင်းသား လက်နက်ကိုင်တပ်နဲ့ စစ်ရေး တင်းမာနေတဲ့ နေရာတွေဘက် ဗုံးကြဲတိုက်ခိုက်နေဆဲ ဖြစ်ပါတယ်။
