ပျားကြီး၊ မတ်လ ၃၁ ရက်၊ မန္တလေး
မန္တလေးမြို့မှာ ဖြစ်ပွားခဲ့တဲ့ ငလျင် လှုပ်ခတ်မှုကြောင့် စစ်ကောင်စီရဲ့ ခွင့်ပြုချက်နဲ့ ပေါ်တင် ဖွင့်လှစ်လုပ်ကိုင်နေတဲ့ ဂျင်ဝိုင်းအဆောက်အဦး ပြုကျပျက်စီးမှုမှာ သေဆုံးသူ ရာနဲ့ချီပြီး ရှိနေတယ်လို့ ဒေသခံတွေက ပြောပါတယ်။
အောင်မြေသာစံမြို့နယ် ၁၁ လမ်းနဲ့ ၈၈ လမ်းထောင့်မှာရှိတဲ့ ၃ ထပ် ဂျင်ဝိုင်းလောင်းကစား အဆောက်အဦးဟာ မတ်လ ၂၈ ရက်က လှုပ်ခတ်ခဲ့တဲ့ ငလျင်ကြောင့် ပြိုကျပျက်စီးခဲ့တာ ဖြစ်ပါတယ်။
“အောက်ဆုံးထပ်က လူအများဆုံးပဲ။ နောက်အထပ်တွေက နည်းတယ်။ ရတာတွေလည်းများတယ်။ ဒါပေမဲ့ ကျန်နေသေးလို့ ဒီနေ့တရုတ်တွေ ခွေးတွေနဲ့ လာရှာကြတာ။ ၂ လောင်း ထပ်တွေ့တယ်” လို့ ဂျင်ဝိုင်းလောင်းကစားရုံ ပြိုကျမှုကို စောင့်ကြည့်နေတဲ့ ဒေသခံတစ်ဦးက ပြောပါတယ်။
အဆောက်အဦး ပြိုကျချိန်မှာ လောင်းကစားသမားပေါင်း ၁၂၀ ကျော်ဟာ အဆောက်အဦးထဲမှာ ရှိနေပြီး အသက်ရှင်လျက် ပြန်လည် ကယ်ထုတ်နိုင်ခဲ့သူ ၁၄ ဦးပဲရှိခဲ့တယ်လို့ မျက်မြင်တွေ့သူ ဒေသခံတစ်ဦးက ပြောပါတယ်။
အဆောက်အဦး ပြိုကျမှု ဖြစ်ပွားအပြီး ၇၂ နာရီအတွင်း သေဆုံးသူ အလောင်း ၇၀ ကျော်ကို ထုတ်ယူနိုင်ခဲ့ပေမဲ့ အနည်းဆုံး လူပေါင်း ၅၀ ကျော် ကျန်ရှိနေနိုင်သေးတယ်လို့ ဒေသခံတွေက ပြောပါတယ်။
ငလျင်ဒဏ်ကြောင့် မန္တလေးမြို့မှာ ပြိုကျပျက်စီးခဲ့တဲ့ အဆောက်အဦးပေါင်း ထောင်နဲ့ချီ ရှိခဲ့ပြီး သေဆုံးသူ ၁ ထောင်ကျော် ရှိခဲ့တယ်လို့ သိရပါတယ်။
