ယာရူစိင်၊ အောက်တိုဘာ ၅ ရက်၊ သီပေါ
တအာင်းတပ်မတော်- PSLF/TNLA ထိန်းချုပ်ထားတဲ့ သီပေါမြို့ကို စစ်ကောင်စီတပ်က လေကြောင်းကနေ ထပ်မံ ဗုံးကြဲတိုက်ခိုက်ခဲ့တာကြောင့် နေအိမ် ၈ လုံးထက်မနည်း ထိမှန်ပျက်စီးသွားတယ်လို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
မနေ့ အောက်တိုဘာ ၄ ရက် ည ၈ နာရီ ၂၂ မိနစ်မှာ သီပေါမြို့ရှိ စစ်ကောင်စီတပ်ရဲ့ စခန်းဟောင်းဖြစ်တဲ့ ခြေလျင်တပ်ရင်း ၂၃ အနီး၊ အထက(၂)ကျောင်းနဲ့ ကျောင်စုရွာ ဘုန်းကြီးကျောင်းကို ဗုံး ၅ လုံး ကြဲချတိုက်ခိုက်ခဲ့ပါတယ်။
“အထက ၂ ကျောင်းထဲ ၂ လုံး ကျတာ။ ကျောင်းအနောက်လည်း ၁ လုံး ကျတယ်။ ၂၃ တပ်နား ၁ လုံး ကျတယ်။ ကျောင်းစုရွာ ဘုန်းကြီးကျောင်းဘက်လည်း ၁ လုံး ကျတယ်။ နေအိမ်ပျက်တာတော့ အများကြီးပါပဲ။ လူအထိအခိုက်တော့ မရှိပါဘူး” လို့ ဒေသခံ အမျိုးသားတစ်ဦးက ပြောပါတယ်။
မနေ့ညနေ ၅ နာရီ ၃၅ မိနစ်မှာလည်း သီပေါမြို့နယ် ကျင်သီရွာကို စစ်တပ်က လေကြောင်းကနေ ဗုံး ၂ လုံး ကြဲချတိုက်ခိုက်ခဲ့တာကြောင့် ဒေသခံ အမျိုးသား ၂ ဦး ထိမှန်ဒဏ်ရာ ရရှိခဲ့ပါတယ်။
မနေ့ တစ်ရက်အတွင်း သီပေါမြို့နယ်ကို စစ်တပ်က လေကြောင်းကနေ ၃ ကြိမ် ဗုံးကြဲတိုက်ခိုက်ခဲ့တာပါ။
အလားတူ မနေ့ နေ့လယ် ၁၂ နာရီကျော်မှာလည်း ဂျက်ဖိုက်တာ အသုံးပြုပြီး နမ့်ဆန်မြို့နယ် ဇယ်တုန်ဟုန်းရွာထဲ ပေါင် ၂၅၀ ဗုံးနှစ်လုံး ကြဲတိုက်ခိုက်ခဲ့တာကြောင့် ကလေး ၂ ဦး သေဆုံးပြီး ၉ ဦး ဒဏ်ရာ ရရှိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
