မိုင်းပန်ပျော်၊ မေလ ၁၆ ရက်၊ တောင်ကြီး
ရှမ်းတောင် တောင်ကြီးမြို့မှာ မိုးရွာသွန်းလို့ မြို့ပေါ်ရပ်ကွက်တချို့ ရေကြီးရေလျှံမှု ဖြစ်ပွားခဲ့တယ်လို့ ဒေသခံတွေဆီက သိရပါတယ်။
မနေ့ မေလ ၁၅ ရက် ညနေပိုင်းမှာ မိုးရွာသွန်းမှုကြောင့် မြို့ပေါ်က ရပ်ကွက်အများစုဟာ ရေကြီးရေလျှံမှုနဲ့ ကြုံခဲ့ရတယ်လို့ တောင်ကြီးဒေသခံ အမျိုးသားတစ်ဦးက ရွှေဖီမြေကို ပြောပါတယ်။
“ဘယ်လိုဖြစ်လဲဆိုတော့ မိုးများတာရယ် ကာထားတဲ့ မြောင်းနံရံ ပြိုလို့ ရေလမ်းကြောင်း လွှဲလာပြီး အိမ်တွေဘက်လည်း ရေတွေ ဝင်လာတာ။ ကားတွေ ဆိုင်ကယ်တွေ မြှုပ်ကုန်တာပေါ့။ ဦးခမ်းရပ်ကွက် လူအထိအခိုက်တော့ မရှိဘူး။ ပစ္စည်းတွေတော့ ဆုံးရှုံးတာ ရှိတယ်”
မိုးရွာသွန်းပြီး ရေကြီးရေလျှံမှုကြောင့် လမ်းပေါ်နဲ့ ရပ်ကွက်အတွင်းမှာရှိတဲ့ နေအိမ်ထဲအထိ အမှိုက် ဝင်ရောက်ခဲ့တယ်လို့ ၎င်းအမျိုးသားက ဆက်ပြောပါတယ်။
၂၀၂၄ စက်တင်ဘာလကလည်း ရှမ်းတောင် တောင်ကြီး၊ အင်းလေး၊ ကလော၊ အောင်ပန်းနဲ့ ညောင်ရွှေမြို့တွေမှာ ရာဂီမုန်တိုင်းကြောင့် ရေကြီးရေလျှံမှု ဖြစ်ပွားခဲ့ပြီး နေအိမ်ပျက်စီး ဆုံးရှုံးမှုနဲ့ လူသေဆုံးမှု ဖြစ်တဲ့အထိ ကြုံခဲ့ရဖူးပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
