အင်းငယ်၊ မတ်လ ၄ရက်၊ မိုးဗြဲ
ရှမ်းပြည်တောင်ပိုင်း၊ ကရင်နီပြည်အစပ်၊ ဖယ်ခုံမြို့နယ်၊ မိုးဗြဲမြို့မှာ စစ်ကောင်စီတပ်နဲ့ တော်လှန်ရေး မဟာမိတ်အင်အားစုတွေကြား တိုက်ပွဲဆက်လက် ပြင်းထန်နေတယ်လို့ မြေပြင်အရင်းအမြစ်တွေက ပြောပါတယ်။
ဒီနေ့ မတ် ၄ မြေပြင်အခြေအနေအရ စစ်ကောင်စီဖက်က လက်နက်ကြီးနဲ့ လေကြောင်းအသုံးပြုလာပြီး စစ်ဘေးရှောင်တွေရှိတဲ့နေရာကို ဦးတည်ပစ်ခတ်နေတယ်လို့ ဆိုပါတယ်။
မိုးဗြဲတစ်ဝိုက် စစ်ရေးလှုပ်ရှားနေသူ မြေပြင်အရင်းအမြစ် တစ်ဦးက “စစ်ကောင်စီဖက်က ဆက်တိုက်ကျတယ်။ ကျနော်တို့ဖက်ကလည်း ကျတာရှိတယ်။ စစ်ကောင်စီက အင်အားတော်တော်များတယ်။ စစ်မှုထမ်း ခေါ်ထားတဲ့လူသစ်တွေကို ရှေ့ကကာပြီး တက်လာတာ” လို့ ပြောပါတယ်။
၂၀၂၅ ခုနှစ် အစပိုင်းကတည်းက စစ်ကောင်စီ၊ ပအိုဝ်းပြည်သူ့စစ် (PNA) ပူးပေါင်းတပ်တွေဟာ ပင်လောင်း – ဖယ်ခုံလမ်းအတိုင်း အင်အား ၇၀၀ နဲ့ စစ်ကြောင်းထိုးလာပြီး လက်ရှိ မိုးဗြဲမြို့ကို ဆက်လက် စစ်ကြောင်းထိုးနေတာ ဖြစ်ပါတယ်။
လက်ရှိ တိုက်ပွဲအထိ စစ်ကောင်စီရဲ့ အလောင်း ၁၂ လောင်းနဲ့အတူ လက်နက်ခဲယမ်းတွေ သိမ်းဆည်းထားနိုင်ပြီး တော်လှန်ရေး အင်အားစုတွေဖက်ကလည်း ရဲဘော် အောင်မြင့်မြတ် အပါအဝင် ၅ ဦးထက်မနည်း ကျဆုံးခဲ့ပြီးဖြစ်တယ်လို့ သိရပါတယ်။
“အခုထိတော့ မြို့ကို မဟာမိတ်တပ်တွေ ထိန်းထားနိုင်သေးတယ်လို့ ပြောလို့ရပါတယ်။ ဒါပေမယ့် ရေရှည်မှာတော့ စစ်ကောင်စီရဲ့ သာလွန်အင်အားကို တောင့်ခံဖို့ မလွယ်ပါဘူး။ ပြည်သူအားလုံး ကျည်တစ်ထောင့်ဖိုးကအစ အကူညီပေးနိုင်တယ်လို့ တောင်းဆိုပါတယ်။ ရှောင်နေကြတဲ့ လူတွေလည်း လောလောဆယ်တော့ ပြန်လို့မရသေးဘူးလို့ ပြောချင်တယ်။ မကြာခင် ကျနော်တို့ ထုတ်ပြန်ဖို့ ရှိပါမယ်” လို့ မြေပြင်အရင်းအမြစ်တစ်ဦးက ဆက်ပြောပါတယ်။
စစ်ကောင်စီတပ်က မိုးဗြဲ – လွိုင်ကော်လမ်းမကြီးကနေတဆင့် ဖားဆောင်း၊ ဘော်လခဲမြို့နယ်တွေကို ထိန်းချုပ်နိုင်ဖို့အတွက် အပြင်းအထန် စစ်ကြောင်းထိုးနေတာလို့ စစ်ရေးအရင်းအမြစ်တွေက သုံးသပ်ပါတယ်။
မတ်လ ၁၊ ၂ ရက်နေ့အတွင်း စစ်ကောင်စီက မိုးဗြဲမြို့ကို လက်နက်ကြီးအပြင် လေကြောင်း တိုက်ခိုက်မှုတွေ ပြုလုပ်ခဲ့ပြီး မိုးဗြဲမြို့ အနောက်ခြမ်းမှာ လယ်စိုက်နေတဲ့ ၁၆ နှစ်အရွယ် အမျိုးသမီး တစ်ဦး သေဆုံးမှုနဲ့အတူ မွေတော်ဘုရားအနီးရှိ လူနေအိမ်တွေ ပျက်စီးခဲ့တယ်လို့ ဆိုပါတယ်။
အလားတူ စစ်ကောင်စီ ပူးပေါင်းတပ်တွေဟာ ဒီမောဆိုမြို့နယ်တွင်းကိုလည်း ဆက်လက်လက် စစ်ကြောင်းထိုးနေပြီး ဒီနေ့ လေကြောင်းပစ်ခတ်မှုကြောင့် လူနေအိမ်တစ်လုံး မီးလောင်ပြာကျ ပျက်စီးခဲ့တယ်လို့ သိရပါတယ်။
