ခိုင်လေး၊ ဇန်နဝါရီ ၂၈ ရက်၊ နမ့်ဖတ်ကာ
ရှမ်းမြောက် ကွတ်ခိုင်မြို့နယ် နမ့်ဖတ်ကာနဲ့ အခြားဒေသမှာ လက်ရှိ ကချင်တပ်မတော်- KIA နဲ့ တအာင်းတပ်- TNLA တို့အကြား နယ်မြေ အငြင်းပွားမှုနဲ့ ပတ်သက်ပြီး နှစ်ဖက် တွေ့ဆုံဆွေးနွေးသွားဖို့ရှိကြောင်း KIO/KIA ရဲ့ ပြောခွင့်ရသူ ဗိုလ်မှူးကြီး နော်ဘူက ရွှေဖီမြေကို ပြောပါတယ်။
KIA အနေနဲ့ ရှမ်းမြောက်မှာ တပ်မဟာ ၄၊ ၆၊ ၁၀ ဆိုပြီး တောင်ပိုင်းတိုင်း အုပ်ချုပ်ရေးရုံး ရှိရာဒေသမှာ တာဝန်ယူထားတဲ့ ပုဂ္ဂိုလ်တွေကို ဆွေးနွေးဖို့ ပြောဆိုထားတယ်လို့ ဆိုပါတယ်။
“ကျနော်တို့ ဗဟိုကော်မတီအနေနဲ့ အဲဘက်ဆင်းပြီးမှ ဆွေးနွေးဖို့က မရှိသေးပါဘူး။ အဲကြောင့်မို့လို့ အဲဒေသခံလူကြီးတွေကို လူချင်း တွေ့ပြီးမှဘဲဖြစ်ဖြစ် စာပို့ပြီးမှဘဲဖြစ်ဖြစ် အချင်းချင်း တွေ့ဆုံဆွေးနွေးပြီးမှ ဖြေရှင်းကြပါဆိုပြီး ညွှန်ကြားထားတာ ရှိတယ်”
လက်နက်နဲ့ အပြန်အလှန် ပစ်ခတ်တာမျိုး မရှိဘဲ TNLA နဲ့ KIA က ရှမ်းမြောက် နမ့်ဖတ်ကာမှာ နယ်မြေ အငြင်းပွားမှု ဗီဒီယိုဖိုင်ဟာ လူမှုကွန်ရက်စာမျက်နှာမှာ ဇန်နဝါရီ ၂၆ ရက်က စတင်ပျံနှံ့လာတာပဲ ဖြစ်ပါတယ်။
မူဆယ်မြို့နယ် တီးမား နမ့်အွန်ဘက်သွားတဲ့ လမ်းပိုင်းမှာရှိတဲ့ KIA ဂိတ်က အခွန် ကောက်နေတာကို TNLA က လက်မခံဘဲ ဂိတ်တွေ သွားရောက် ပိတ်သိမ်းချိန်မှာ နှစ်ဖက်တပ် အခြေအတင် ဖြစ်ခဲ့တာပါ။
“မိုင်းဝီးဘက်မှာ TNLA တွေကလည်း သူတို့ရွာသားတွေကို ခေါ်ပြီး ဂိတ်တွေ ဖျက်တယ်ပေါ့နော်။ KIA တွေကလည်း သူတို့ရွာသားတွေခေါ်ပြီး အဲလိုဘဲ ဂိတ်တွေ လိုက်ဖျက်တယ်။ ဂိတ်တွေကိုလဲ အပြန်အလှန် ပိတ်ဆို့တာမျိုးတွေ ပြုလုပ်နေတာ ရှိတယ်ပေါ့နော်”
မူဆယ်မြို့နယ် ကောင်းဝိန်းအုပ်စု မန့်ဖာရွာရဲ့ ဆိုင်းဘုတ်ကို KIA က ဖျက်ဆီးပြီးနောက် ရွာခံတွေဘက်က မကျေနပ်လို့ ကချင်ဆိုင်းဘုတ်တွေကို ပြန်ဖျက်ဖို့ လုပ်နေချိန်မှာ ပြန်လည် တောင်းပန်ပြီး ပြုပြင်ပေးသွားမယ်လို့ KIA ဘက်က ပြောဆိုထားတာ ရှိတယ်လို့ သူက ဆက်ပြောပါတယ်။
မုံးကိုး၊ နမ့်ဖတ်ကာ၊ မိုင်းဝီး၊ မန်တုံနဲ့ မိုးမိတ်ကြားမှာရှိတဲ့ ဂိတ်တွေမှာ အပြန်အလှန် ပိတ်ဆို့ကာ အငြင်းပွားမှုနဲ့ ပတ်သက်ပြီး PSLF/TNLA ရဲ့ ပြောရေးဆိုခွင့်ရှိသူ လွေးယေဦးကို ရွှေဖီမြေက ဆက်သွယ်မေးမြန်းထားဆဲ ဖြစ်ပါတယ်။
၂၀၂၃ အောက်တိုဘာ ၂၇ ရက်က TNLA နဲ့အတူ မဟာမိတ်တပ်ဖွဲ့က ၁၀၂၇ စစ်ဆင်ရေးကို ဆင်နွှဲပြီးတော့ စစ်ဆင်ရေးအတွင်း TNLA က မြို့ ၁၂ မြို့ကို တိုက်ခိုက်သိမ်းပိုက်ထားတာပဲ ဖြစ်ပါတယ်။
