မင်းပြားမြို့ကို စစ်တပ်က ဗုံးကြဲတိုက်ခိုက်လို့ ဒေသခံ ၄ ဦး သေဆုံး၊ ၁၀ ဦး ဒဏ်ရာရ

ယာရူစိင်၊ နိုဝင်ဘာ ၈ ရက်၊ မင်းပြား

ရခိုင်ပြည်နယ် မင်းပြားမြို့ကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ ဒေသခံ ၄ ဦး သေဆုံးပြီး ၁၀ ဦး ထိမှန်ဒဏ်ရာရရှိခဲ့တယ်လို့ မင်းပြားမြို့ခံ အမျိုးသားတစ်ဦးက ရွှေဖီမြေကို ပြောပါတယ်။

မနေ့ နိုဝင်ဘာလ ၇ ရက် ည ၈ နာရီဝန်းကျင်မှာ မင်းပြားမြို့ မြို့သစ်ရပ်ကွက်ကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာ ဖြစ်ပါတယ်။

“လူနေရပ်ကွက်ကို ကြဲသွားတာပါ။ ဒဏ်ရာရတဲ့သူတွေလည်း များတယ်။ ဒဏ်ရာပြင်းထန်သူတွေလည်း များပါတယ်။ သေဆုံးမှုလည်း ထပ်တိုးနိုင်ပါတယ်” လို့ မင်းပြားမြို့ခံ အမျိုးသားတစ်ဦးက ပြောပါတယ်။

စစ်ကောင်စီတပ်ရဲ့ အဲဒီဗုံးကြဲတိုက်ခိုက်မှုကြောင့် အမျိုးသား ၃ ဦးနဲ့ အမျိုးသမီး ၁ ဦးတို့ သေဆုံးခဲ့ရတာ ဖြစ်ပါတယ်။

“မနေ့မှာတင် ပုဏ္ဏားကျွန်း၊ မင်းပြားနဲ့ ပလက်ဝမြို့နယ်တွေကို ကြဲသွားတယ်။ ပလက်ဝမြို့ ဗုံးကြဲတိုက်ခိုက်တာတော့ ထိခိုက်သေဆုံးမှု အတိအကျကိုတော့ မသိရသေးဘူး” လို့ အထက်ပါ သတင်းအရင်းအမြစ်က ဆက်ပြောပါတယ်။

မနေ့ နိုဝင်ဘာလ ၇ ရက် မနက် ၁၁ နာရီခွဲမှာလည်း ပုဏ္ဏားကျွန်းမြို့နယ် ယိုးတရုပ်ရွာကို စစ်ကောင်စီတပ်က လေကြောင်းကနေ တိုက်ခိုက်ခဲ့ပြီး ကွမ်းတောင်နဲ့ အောင်ဖြူပြင်ရွာကို လက်နက်ကြီးနဲ့ ပစ်ခတ်ခဲ့တာကြောင့် ဒေသခံ ၅ ဦး သေဆုံးပြီး ၉ ဦး ဒဏ်ရာ ရရှိခဲ့ပါတယ်။

~ ~ ~

ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။

Shwe Phee Myay YouTube

Shwe Phee Myay Telegram