ရွှေဖီမြေ၊ မေ ၁၄
နိုင်ငံရေးအကျဥ်းသားဟောင်းတစ်ဦးဖြစ်တဲ့ ဒေါက်တာနေဝင်းဟာ ဒီနေ့ မေလ ၁၄ရက် မနက်အစောပိုင်းက ရန်ကုန်မြို့၊ အင်းစိန်ဆေးရုံမှာကွယ်လွန်သွားခဲ့တယ်လို့ မိသားစုဝင်တွေနဲ့ နီးစပ်သူတွေကအတည်ပြု ပြောဆိုပါတယ်။
န.ဝ.တ၊ န.အ.ဖ စစ်အစိုးရတွေရဲ့နှစ်ရှည်မတရားဖမ်းဆီးထောင်ချမှုတွေကိုခံခဲ့ရတဲ့ တိရစ္ဆာန်ဆေးကုဆရာဝန်ဒေါက်တာနေဝင်းဟာ အသက် ၆၅ နှစ်အရွယ်မှာ ကွယ်လွန်ခဲ့တာဖြစ်ပါတယ်။
ဗ.က.သ ခေါင်းဆောင်တစ်ဦးဖြစ်တဲ့ မဖြိုးဖြိုးအောင်ရဲ့ဖခင်ဖြစ်တဲ့ ဒေါက်တာနေဝင်းဟာ သူတတ်ကျွမ်းတဲ့ တရုတ်အပ်စိုက်ပညာနဲ့ လူတိုင်းကိုကူညီပေးလေ့ရှိတာကြောင့် လူအများရဲ့ချစ်ခင်မှုကိုရရှိခဲ့တဲ့ နိုင်ငံရေးသမားတစ်ဦး ဖြစ်ပါတယ်။
ဒေါက်တာနေဝင်းဟာ န.ဝ.တ စစ်တပ်ရဲ့ ဗမာပြည်ကွန်မြူနစ်ပါတီ၏ နိုင်ငံတော်အာဏာသိမ်းပိုက်ရေးလှုပ်ရှားမှုများဆိုတဲ့ခေါင်းစဥ်နဲ့ ၁၉၈၉ ခုနှစ်မှာ ဖမ်းဆီးခံရပြီးထောင်ဒဏ် ၁၆ နှစ်ချမှတ်ခံခဲ့ရသူဖြစ်ပါတယ်။
ထောင်ကလွတ်ပြီးနောက်ပိုင်း နာဂစ်မုန်တိုင်းဒဏ်ကြောင့် သေဆုံးခဲ့သူတွေကို သင်္ဂြိုလ်ပေးခဲ့တာကြောင့် ၂၀၀၈ ခုနှစ်မှာပဲ န.အ.ဖ စစ်တပ်ကထောင်ဒဏ် ၂ နှစ်ချမှတ်တာကို ခံခဲ့ရပြန်ပါတယ်။
သမီးဖြစ်သူ မဖြိုးဖြိုးအောင်တို့ ဦးဆောင်ပါဝင်ခဲ့တဲ့ ၂၀၁၅ ခုနှစ် အမျိုးသားပညာရေးဥပဒေပြင်ဆင်ရေးသပိတ်နဲ့ လှုပ်ရှားမှုတွေမှာ ကူညီပေးခဲ့တာကြောင့် စစ်တပ်ရဲ့ အညှိုးထားမှုကိုခံခဲ့ရပါသေးတယ်။
ဒေါက်တာနေဝင်းကွယ်လွန်ချိန်မှာ သမီးဖြစ်သူ မဖြိုးဖြိုးအောင်ဟာ စစ်ကောင်စီလက်ချက်နဲ့ တိမ်းရှောင်နေရပြီး သားမက်ဖြစ်သူ ကိုဂျိမ်းစ်ဟာလည်း လက်ရှိအချိန်ထိ အင်းစိန်ထောင်ထဲမှာ ဖမ်းဆီးချုပ်နှောင်ခံနေရဆဲဖြစ်တယ်လို့ မိသားစုနဲ့နီးစပ်သူတွေကဆိုပါတယ်။
