လွေးလာဝ်ဇာရ်၊ ဧပြီ ၃ ရက်၊ အမရပူရ
မန္တလေးတိုင်း အမရပူရမြို့နယ် ဗုံးအိုးရွာရဲ့ တစ်ဖက်ကမ်းမှာရှိတဲ့ သာလေစွရွာမှာ အခြေခံ စားသောက်ကုန်နဲ့ သောက်ရေသန့် လိုအပ်နေတယ်လို့ သာလေစွရွာက ကူညီပေးနေသူတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ မတ်လ ၂၈ ရက်က လှုပ်ခတ်သွားတဲ့ ၇.၇ ပြင်းအားရှိတဲ့ မြေငလျင်ကြောင့် ဗလီ ပြိုကျလို့ သာလေစွရွာက လူ ၁၃ ဦး သေဆုံးခဲ့ပါတယ်။
အိမ်ခြေ ၆၈၀ ကျော်ရှိတဲ့ သာလေစွရွာဟာ နေအိမ် ၁၀ လုံးကျော် လုံးဝ ပြိုကျခဲ့ပြီး တချို့အိမ်တွေ အက်ကွဲတာနဲ့ တချို့ကလည်း ငလျင် ထပ်လှုပ်မှာကို စိုးရိမ်တာကြောင့် သစ်ပင်အောက်မှာ မိုးကာတဲထိုးပြီး နေထိုင်ကြတယ်လို့ ဆိုပါတယ်။
“ကျနော်တို့တစ်ရွာလုံး အိမ်ထဲမှာ ဘယ်သူမှမနေရဲကြတော့ဘူး။ ဖြစ်ပြီးတဲ့အချိန် ဘယ်သူမှ မလာဘူး။ ကျနော်တို့ နေတဲ့နေရာက လူသိနည်းတယ်။ လမ်းခရီးတွေလည်း ပျက်စီးနေတာ။ အလှူရှင်တွေက မနေ့မှ ရောက်တာ။ ရောက်ပေမဲ့ နည်းသေးတယ်ပေါ့နော်။ ဆေးကုသပေးတဲ့ အဖွဲ့တွေလည်း လာတယ်။ အခုက မီး မရှိတာ။ လိုအပ်သေးတာက ခြင်ထောင်တို့၊ ဆိုလာပြားတို့၊ အဓိက စားသောက်ကုန်တွေ လိုအပ်တယ်”
သာလေစွရွာမှာ အလှူရှင်တွေ ရောက်ရှိပေမဲ့ အရောက်နည်းတာကြောင့် အလှူရှင်တွေရဲ့ အကူအညီ ထပ်မံ လိုအပ်နေသေးတယ်လို့ အထက်ပါ ကူညီပေးနေသူတစ်ဦးက ပြောဆိုပါတယ်။
အမရပူရမြို့နယ် ဗုံးအိုးရွာမှာလည်း မြေငလျင်ကြောင့် ဗလီ ၉ လုံး ပြိုကျလို့ သေဆုံးသူ ၃၀၀ ဦးအထိ ရှိလာပြီလို့ ဒေသခံတွေက ရွှေဖီမြေကို ပြောပါတယ်။
