အိုက်ပွီး၊ ဧပြီ ၁၈ ရက်၊ မတူပီ
ချင်းပြည်နယ်တောင်ပိုင်း မတူပီမြို့ကို စစ်ကောင်စီတပ် လေကြောင်းကနေ ဗုံးကြဲတိုက်ခိုက်တာကြောင့် ပါစတာတစ်ဦးအပါအဝင် အရပ်သား ၅ ဦး ဒဏ်ရာရပြီး လူနေအိမ်တချို့ ပျက်စီးသွားတယ်လို့ ဒေသခံတွေက ရွှေဖီမြေသို့ ပြောပါတယ်။
မနေ့ ဧပြီ ၁၇ ရက် နေ့လယ် ၂ နာရီဝန်းကျင်မှာ မတူပီမြို့ထဲတစ်နေရာနဲ့ မြို့အနီးဝန်းကျင်မှာ လေကြောင်းကနေ ဗုံးကြဲတိုက်ခိုက်မှု သုံးကြိမ်ခန့် ပြုလုပ်သွားတာပဲ ဖြစ်ပါတယ်။
ဗုံးကြဲတိုက်ခိုက်မှုကြောင့် ပါစတာတစ်ဦးဟာ ခြေတစ်ဖက် ပြတ်ထွက်သွားပြီး ပြင်းထန်ဒဏ်ရာရကာ နောက်ထပ် နှစ်ဦးကလည်း ပြင်းထန်ဒဏ်ရာနဲ့ အရေးပေါ်လူနာဖြစ် ဆေးကုသမှု ခံယူနေရပါတယ်။
မတူပီဒေသခံတစ်ဦးက “ပြင်းထန်ဒဏ်ရာရတဲ့ သုံးယောက်က ပါစတာ မိသားစုဝင်တွေပါ။ ပါစတာရယ် သူ့ဇနီးနဲ့ သမီးတွေ ဖြစ်ပါတယ်။ ပါစတာကတော့ ခြေတစ်ဖက် ပြတ်သွားတယ်။ သုံးယောက်လုံး အရေးပေါ် ဆေးကုသမှု ခံယူနေရတယ်။ ဒဏ်ရာတွေ ပြင်းထန်နေတာကြောင့် စိုးရိမ်ရတယ်” လို့ ရွှေဖီမြေသို့ ပြောပါတယ်။
ဒါ့အပြင် လေကြောင်း တိုက်ခိုက်မှုကြောင့် ဘုရားကျောင်းအပါဝင် နေအိမ် ၅ လုံးထက်မနည်း ဗုံးထိမှန်ပျက်စီးသွားပါတယ်။
မတူပီမြို့ကို ၂၀၂၄ ခုနှစ် ဇွန်လ ၂၉ ရက်မှာ ချင်းညီနောင်နဲ့ AA ပါဝင်တဲ့ မဟာမိတ် ပူးပေါင်းတပ်တွေက သိမ်းပိုက်ရရှိခဲ့ပြီးနောက် မြို့သိမ်းတိုက်ပွဲအတွင်း တိမ်းရှောင်နေကြတဲ့ ဒေသခံတွေဟာ မြို့ထဲ ပြန်လည် နေထိုင်ကြပြီလို့ သိရပါတယ်။
မတူပီမြို့အပါအဝင် မင်းတပ်၊ ကန်ပက်လက် စတဲ့မြို့နယ်မှာလည်း စစ်တပ်က ဒီရက်ပိုင်းတွင်း လေကြောင်း ဗုံးကြဲတိုက်ခိုက်မှု ပြုလုပ်နေပါတယ်။
“အရင်ရက်တွေကတည်းက မတူပီမှာ တောက်လျှောက် လေယာဉ်တွေ လာနေတယ်။ ဒါပေမဲ့ ဗုံးကြဲတာတွေက မရှိသေးဘူး။ မနေ့ကပဲ ဗုံးကြဲသွားတာပါ။ မြို့ထဲမှာ အရပ်သားတွေ ပြန်နေကြပြီ။ အခုလို လေကြောင်း တိုက်ခိုက်မှုတွေကြောင့် သူတို့တွေလည်း စိုးရိမ်နေကြပါတယ်” လို့ မတူပီဒေသခံတစ်ဦးက ရွှေဖီမြေသို့ ပြောပါတယ်။
ပြီးခဲ့တဲ့နှစ် ၂၀၂၄ နှစ်ကုန်ပိုင်းလောက်ကလည်း မတူပီမြို့မှာ မကြာခဏ လေကြောင်း တိုက်ခိုက်တာ ခံရပြီး လူနေအိမ်နဲ့အဆောက်အဦးတွေ ပျက်စီးခဲ့ပါတယ်။
