ဇူလိုင် ၁၃၊ ၂၀၂၅
ကချင်ပြည်နယ် ဖားကန့်ဒေသမှာ မနေ့ ဇူလိုင်လ ၁၂ ရက်နေ့ညတိုက်ပွဲ ဖြစ်ပွားပြီး အပြန်အလှန် ပစ်ခတ်မှုအတွင်း ဒေသခံတွေ ထိမှန်သေဆုံးမှုရှိကာ နေအိမ် မီးလောင်တာတွေလည်း ရှိနေကြောင်း ဒေသခံတွေဆီက သိရပါတယ်။
“ယူမာ နဲ့ ဖားကန့် ကြား ရွှေမြန်မာ ဆီဆိုင်ရှေ့မှာ မနေ့ ဇူလိုင်လ ၁၂ ရက် ည ၇ နာရီ ဝန်းကျင်ခန့်က အမျိုးသား တစ်ဦး ကျည်ထိ သေဆုံးထားတာလို့ သိရတယ်။ အဲဒီ ရွှေမြန်မာနား နှစ်ဖက် ပစ်ခတ်သံတွေရော ကြားနေခဲ့တာ မနေ့ညက” လို့ ဒေသခံ တစ်ဦးက ရွှေဖီမြေကို ပြောပါတယ်။
အပြန်အလှန် ပစ်ခတ်မှုအတွင်း ဖြတ်သွား ဖြစ်လာ ကားတစ်စီးပေါ်က ဝှေခါ ဒေသခံ အမျိုးသားတစ်ဦးလည်း ကျည်ထိမှန် သေဆုံးသွားခဲ့တယ်လို့ သူက ပြောပါတယ်။
“လက်နက်ကြီးကျလို့ မီးလောင်သွားတဲ့ အိမ်ကတော့ အိမ်ရှင်ကတော့ မြစ်ကြီးနား ဆင်းသွားတာကြာပြီ။ အိမ် စောင့်ပဲ ရှိတာပါ။ မီးလောင်တာတော့ လူထိခိုက်မှုတော့ မရှိဘူးကြားတယ်။” လို့ နောက်ထပ် ဒေသခံ တစ်ဦးက ပြောပါတယ်။
မနေ့ ဇူလိုင်လ ၁၂ ရက်နေ့ ည ၉ နာရီခွဲခန့်က ဖားကန့်၊ အေးမြသာယာရပ်ကွက်၊ အရှင်ကြီးနတ်စင်ကုန်းနောက်ဘက် မှော်မောင်းလျှံကျေးရွာ အတက်လမ်း Jade Land ကုမ္ပဏီဘေး လက်နက်ကြီးကျလို့ မီးလောင်သွားတာလို့ သူက ပြောပါတယ်။
ဖားကန့်ဒေသမှာ ပြီးခဲ့တဲ့လကစ တိုက်ပွဲတွေ ဆက်တိုက်ဖြစ်ပွားလာတာကြောင့် ဒေသခံ ထောင်ချီ တိုက်ပွဲ ရှောင်နေရကာ အဓိက ဆန်အခက်အခဲ ဖြစ်နေကြတယ်လို့ နောက်ထပ် ဒေသခံ တစ်ဦးက ပြောပါတယ်။
ဖားကန့်ဒေသမှာ ပြီးခဲ့တဲ့ မေလ ၂၇ ရက်နေ့ကစ စစ်ကောင်စီ စစ်ကြောင်းတွေ ကာမိုင်းဘက်က အင်အားဖြည့် ရောက်ရှိလာပြီး မနေ့ ဇူလိုင်လ ၁၂ ရက်နေ့ညအထိ နေ့တိုင်းနီးပါး တိုက်ပွဲ ဖြစ်ပွား နေတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
