မိုင်းပန်ပျော်၊ မတ်လ ၁၀ ရက်၊ မိုးဗြဲ
ရှမ်းဝောာင် ရှမ်း-ကရင်နီနယ်စပ် ဖယ်ခုံမြို့နယ် မိုးဗြဲမြို့မှာ စစ်ကောင်စီတပ်နဲ့ တော်လှန်ရေးတပ်ဖွဲ့တို့ တိုက်ပွဲ ဆက်လက်ပြင်းထန်နေပြီး စစ်တပ်က အသေခံဒရုန်းနဲ့ တိုက်ခိုက်နေတယ်လို့ မြေပြင်သတင်းရင်းမြစ်တွေဆီက သိရပါတယ်။
တိုက်ပွဲ ပြင်းထန်နေတာကြောင့် စစ်တပ်ဘက်က အသေခံဒရုန်းနဲ့ မနေ့ မတ်လ ၉ ရက်ကစပြီးတော့ အသုံးပြုတိုက်ခိုက်လာတာ ရှိတယ်လို့ တပ်ရင်းတာဝန်ရှိသူတစ်ဦးက ရွှေဖီမြေကို ပြောပါတယ်။
“ဟုတ်ကဲ့ သူတို့အနေနဲ့ မနေ့ညကတည်းက အသေခံဒရုန်းတွေ စပြီးသုံးလာတာပေါ့နော်။ တိုက်ပွဲကတော့ နေ့တိုင်း ပြင်းထန်နေပါတယ်။ စစ်ကောင်စီဘက်က အသေခံ ဒရုန်းနဲ့ကော လက်နက်ကြီးကော ဆက်တိုက်ပစ်နေတယ်။ အခုရက်ပိုင်းဆိုလည်း တိုက်ပွဲပိုပြင်းထန်လာတယ် မြေပြင်ထိတွေ့မှု နေ့တိုင်း ရှိပါတယ်”
တိုက်ပွဲအတွင်း တပ်သားတွေက ဒဏ်ရာရတာတွေ ရှိတာကြောင့် ဆေးဝါးအကူအညီနဲ့ အခြားအကူအညီလည်း လိုအပ်နေတာ ရှိတယ်လို့ ဆိုပါတယ်။
ဒါ့အပြင် စစ်တပ်ဘက်က ဒရုန်းနဲ့ လက်နက်ကြီး ဆက်တိုက် ပစ်ခတ်နေတာကြောင့် ဒေသခံတွေအနေနဲ့ မိုးဗြဲ လမ်းမကြီးကို အသုံးမပြုကြဖို့လည်း သတိပေးချင်တယ်လို့ ၎င်းက ဆက်ပြောပါတယ်။
