မြတ်နိုး၊ အောက်တိုဘာ ၇
ကချင်ပြည်နယ်၊ ဖားကန့်၊ ဝိုင်းမော်၊ ဗန်းမော်တွေမှာ မနေ့ အောက်တိုဘာလ ၆ ရက် သီတင်းကျွတ်လပြည့် နေ့ကစ တိုက်ပွဲဖြစ်ပွါးခဲ့ပြီး ပြင်းထန်နေတဲ့ နေရာတွေလည်း ရှိတယ်လို့ ရှေ့တန်းနဲ့ နီးစပ်သူတွေဆီက သိရပါတယ်။
“မနေ့ အောက်တိုဘာလ ၆ ရက်နေ့ မနက်ပိုင်းကစ ဖားကန့်ဘက် ပစ်ခတ်သံ ပြန်စကြားရပြီ။ နေ့ခင်း ၁၁ နာရီလောက် ခဏ ငြိမ်သွားပြီး ၁၁ နာရီ မိနစ် ၄၀ လောက်မှာ ဖားကန့် နမ္မဖြစ် ကျောက်တောင်ဘက် တိုက်ပွဲစဖြစ်လာတယ်။” လို့ ရှေ့တန်းနဲ့ နီးစပ်တဲ့ အမျိုးသား တစ်ဦးက ပြောပါတယ်။
စစ်ကောင်စီတပ်ဖွဲ့တွေက ဖားကန့် ငြိမ်းချမ်းသာယာရွာဘက်ကနေ ဖားကန့် နမ္မဖြစ်ရွာနဲ့ မလန်းရွာတွေဘက် စစ်ကြောင်းထိုးရာက KIA နဲ့ ပူးပေါင်းတော်လှန်ရေးတပ်ဖွဲ့တို့နဲ့ ထိတွေ့ တိုက်ပွဲ ဖြစ်ပွားတာဖြစ်ပြီး မလန်းရွာဘက်က ဒေသခံ အရပ်သား နှစ်ဦးလည်း လက်နက်ကြီးကျည်စ ထိမှန် ဒဏ်ရာရခဲ့တာရှိတယ်လို့ ဆိုပါတယ်။
“မနေ့ အောက်တိုဘာလ ၆ ရက်နေ့က ဖားကန့် နဲ့ ဝိုင်းမော် လုမြန်ရွာတွေဘက် တိုက်ပွဲ အတော်ပြင်းထန်တယ်။ မင်းဇေသန့် ပြည်သူ့စစ် အဖွဲ့က အတော် အထိနာတယ်လို့ သိရတယ်။ ဝိုင်းမော် လုမြန်ရွာ ဝန်းကျင်မှာက မွန်းလွဲ ၂ နာရီခန့်ကစ တိုက်ပွဲ ပြင်းပြင်းထန်ထန် ဖြစ်ပွါးတယ်” လို့ ရှေ့တန်းနဲ့ နီးစပ်တဲ့ အမျိုးသမီး တစ်ဦးကလည်း ပြောပါတယ်။
ဝိုင်းမော် လုမြန်ရွာဘက် တိုက်ပွဲမှာတော့ စစ်ကောင်စီ ဘက်က ထိုးစစ် ခါတိုင်းထက် ထပ်တိုးမြှင့်လာနေပြီး မနေ့ညနေပိုင်း မင်းဇေသန့် ပြည်သူ့ အဖွဲ့ရဲ့ အလောင်းတွေ အပုံလိုက်ရထားတာရှိကာ KIA နဲ့ ပူးပေါင်း တော်လှန်ရေးဘက်က ၂ ဦး ကျဆုံးပြီး ထိခိုက် ဒဏ်ရာရသူတွေလည်း ရှိတယ်လို့ သူက ပြောပါတယ်။
“ဗန်းမော်ဘက်တော့ စစ်ကောင်စီတွေ ထိုးစစ် ပြန်ထိုးလာလို့ တိုက်ပွဲ ပြင်းထန်နေတုန်းပဲ။ နည်းနည်းမှ မနားဘူး။ စစ်ကောင်စီဘက်ကတော့ လေကြောင်းနဲ့ တောက်လျှောက် ဗုံးကြဲတိုက်ခိုက်နေတယ်လို့ သိရတယ်” လို့ နောက်ထပ် ရှေ့တန်းနဲ့ နီးစပ်တဲ့ အမျိုးသမီး တစ်ဦးက ပြောပါတယ်။
ပြီးခဲ့တဲ့ လကုန်ပိုင်းက စစ်ကောင်စီဘက်က လက်နက်အင်အား၊ လူအင်အား အလုံးအရင်းနဲ့ ထိုးစစ်ဆင်လာလို့ ဗန်းမော်မြို့ပေါ်က KIA နဲ့ ပူးပေါင်းတပ်ဖွဲ့တွေ နေရာတချို့ ဆုတ်ခွာထားပေမယ့် ပြန်လည် သိမ်းပိုက်ရှိထားတဲ့ တပ်စခန်းရှိပြီး စစ်ကောင်စီ တပ်ဖွဲ့ဘက်ကတော့ ပြည်ထောင်စု လမ်းမကြီး အတိုင်းစစ်ကြောင်းထိုးကာ ဖောက်ထွက်ဖို့ ကြိုးစားနေကြတယ်လို့ ရှေ့တန်းသတင်းရင်းမြစ် တစ်ဦးက ပြောပါတယ်။
ဖားကန့်၊ ဝိုင်းမော်၊ ဗန်းမော်တွေမှာတော့ စစ်ကောင်စီက လာမယ့် ဒီဇင်ဘာမှာ ကျင်းပမယ့် ရွေးကောက်ပွဲ ပြုလုပ်မယ့် မြို့တွေတွေမှာ ထည့်သွင်းထားတာကို တွေ့ရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
