မိုင်းရူပ၊ ဇန်နဝါရီ ၉ ရက်၊ ရပ်စောက်
ရှမ်းတောင် ရပ်စောက်မြို့နယ် ကျောက်ဂူဒေသမှာ စစ်ကောင်စီတပ်နဲ့ ဓနုပြည်သူ့လွတ်မြောက်ရေး တပ်တော်- DPLA တို့အကြား တိုက်ပွဲ ဆက်ဖြစ်နေတယ်လို့ DPLA ရဲ့ ပြောရေးဆိုခွင့်ရှိသူက ရွှေဖီမြေကို ပြောပါတယ်။
ကျောက်ဂူဒေသမှာ စစ်ကူ ပို့နေတဲ့ စစ်ကောင်စီတပ်ဖွဲ့ဝင်နဲ့အပြင် ရှမ်းမြောက် နောင်ချိုမြို့နယ် တောင်းခမ်းရွာဘက် စစ်ကူ ပို့နေတဲ့ စစ်တပ်နဲ့ တိုက်ပွဲ ဖြစ်ပွားနေတာ ဖြစ်ပါတယ်။
“ပစ်ခတ်မှု နေ့စဥ် တိုက်ပွဲ နေ့စဥ်လိုလို ဖြစ်နေပါတယ်ဗျ” လို့ DPLA ရဲ့ ပြောရေးဆိုခွင့်ရှိသူက ရွှေဖီမြေကို ပြောပါတယ်။
ကျောက်ဂူမှာ စစ်ကောင်စီရဲ့ အမြှောက်တပ် ၃၄၉ စခန်း အခြေစိုက်ထားတာဖြစ်ပြီး ရပ်စောက်-ကျောက်ဂူ လမ်းပိုင်းဟာလည်း တအာင်းတပ်မတော်- TNLA နဲ့ စစ်တပ်တို့အကြား တိုက်ပွဲ ပြင်းထန်နေတဲ့ တောင်းခမ်းရွာဘက်ကို စစ်ကောင်စီက စစ်အင်အား အဓိက ဖြည့်တင်းနေတဲ့လမ်းကြောင်း ဖြစ်ပါတယ်။
စစ်ကောင်စီရဲ့ အမြှောက်တပ် တည်ရှိရာ တောင်းခမ်းရွာမှာလည်း စစ်တပ်နဲ့ TNLA တို့အကြား နေ့စဥ်လိုလို တိုက်ပွဲ ပြင်းထန်နေတယ်လို့ ရှေ့တန်း စစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
“တောင်းခမ်းဘက်မှာ တိုက်ပွဲတွေ ဆက်ဖြစ်နေတယ်။ အုမ္မတီးနဲ့ ဘန့်ဘွေးဘက်မှာ စစ်ကောင်စီက ဒရုန်းနဲ့ ကြဲတာရှိတယ်” လို့ ပြောပါတယ်။
စစ်တပ်ဘက်ကတော့ ကျောက်ဂူနဲ့ တောင်းခမ်းရွာက တိုက်ပွဲနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
