မြတ်နိုး၊ ဇူလိုင် ၁၂၊ ဖားကန့်
ကချင်ပြည်နယ် ဖားကန့်မြို့နယ်မှာ မနေ့ ဇူလိုင်လ ၁၁ ရက်က စစ်ကောင်စီတပ်နဲ့ KIA၊ပူးပေါက်းတပ်တို့ တိုက်ပွဲပြင်းထန်ခဲ့ပြီး စစ်ကောင်စီဘက်က ထိခိုက်သေဆုံးမှုများခဲ့တယ်လို့ ရှေ့တန်းနဲ့ နီးစပ်သူတွေနဲ့ ဒေသခံတွေဆီက သိရပါတယ်။
“မနေ့ မနက် ဖားကန့် ဆွတ်ဘွမ် (အမှိုက်ပုံ)က စစ်ကောင်စီစခန်းကို သွားရောက် တိုက်ခိုက်တာ။ အဲမှာ စစ်ကောင်စီ ၁၀ ယောက်လောက် သေတယ်။ ချင်း ဘုရားကျောင်းဘက် တပ်ဆုတ်သွားတယ်” လို့ ရှေ့တန်းနဲ့ နီးစပ်သူ တစ်ဦးက ပြောပါတယ်။
နေ့လယ်ပိုင်းမှာတော့ စစ်ကောင်စီအဖွဲ့ရဲ့ လက်နက် စုပုံထားတဲ့နေရာ ထပ်ပေါက်ကွဲခဲ့လို့ စစ်ကောင်စီတပ်တွေ သေဆုံးတာ ထပ်တိုးတာတွေရှိတယ်လို့ သူက ပြောပါတယ်။
“အမှိုက်ပုံဘက်က နေအိမ်တစ်အိမ်ပေါ် တည့်တည့် လက်နက်ကြီးကျတာ။ ပြာဖြစ်သွားပြီ။ ဘုန်းကြီးကျောင်းက ဦးဇင်းနဲ့ ရွာသားတချို့ သွားငြိမ်းလို့ တခြား အိမ်တွေဘက် မကူးဘူး” လို့ ဒေသခံ တစ်ဦးက ပြောပါတယ်။
ဖားကန့် အမှိုက်ပုံရွာမှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေကို ဇူလိုင်လ ၁၁ ရက်နေ့ နေ့ခင်းက KIA နဲ့ KPDF ပူးပေါင်းတော်လှန်ရေးတပ်ဖွဲ့တွေက သွားရောက်တိုက်ခိုက်တာမှာ စစ်ကောင်စီတပ်ဖွဲ့တွေ ကျည်ထားတဲ့နေရာ တည့်တည့် လက်နက်ကြီးကျရောက် ပေါက်ကွဲလို့ ထပ်ဆင့်ပေါက်ကွဲသွားတယ်လို့ KPDF နဲ့ နီးစပ်သူဆီက သိရပါတယ်။
စစ်ကောင်စီက ဖားကန့်ဒေသကို ပြန်လည်စိုးမိုး ထိန်းချုပ်နိုင်ဖို့ ပြီးခဲ့တဲ့ ဇွန်လ လဆန်းပိုင်းကစ ထိုးစစ်ဆင်နေတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
