လွေးဇွန်မိုး၊ ဇန်နဝါရီ ၁၈ ရက်၊ ဆီဆိုင်
ရှမ်းတောင် ဆီဆိုင်မြို့နယ် အရှေ့ဘက်ခြမ်းမှာ စစ်ကောင်စီတပ်နဲ့ ပအိုဝ်းတပ်မတော်- PNLA/PNLO တို့အကြား တိုက်ပွဲ ပြင်းထန်နေပြီး တိုက်ပွဲအတွင်း စစ်တပ်ဘက်က ၁၀၀ ကျော် သေဆုံးခဲ့တယ်လို့ PNLO က ဒီနေ့ ဇန်နဝါရီ ၁၈ ရက်မှာ ထုတ်ပြန်လာပါတယ်။
မနေ့ ဇန်နဝါရီ ၁၇ ရက်က စစ်တပ်နဲ့ ၎င်းရဲ့ လက်အောက်ခံ ပအိုဝ်းပြည်သူ့စစ်- PNO ဟာ အပင်ငို၊ နောင်ကျောရွာအနီးနဲ့ ဖြီကျွတ်ရွာအနီး စစ်ကြောင်း လေးကြောင်းနဲ့ အင်အား ၅၀၀ ကျော် စစ်ကြောင်းထိုး ဝင်ရောက်ခဲ့တာကြောင့် တစ်နေကုန် တိုက်ပွဲဖြစ်ပွားခဲ့တယ်လို့ ဆိုပါတယ်။
စစ်တပ်နဲ့ PNO က ဆီဆိုင်မြို့နယ်ကို ပြန်လည် စိုးမိုးနိုင်ဖို့ ထိုးစစ်ဆင်နေတာဖြစ်ပြီး တိုက်ပွဲမှာ စစ်ကောင်စီတပ်က ကွပ်ကဲတဲ့အပိုင်း၊ ဆက်သွယ်ရေးအပိုင်း၊ လေယာဥ်နဲ့ လက်နက်ကြီး ပစ်ကူပေးတဲ့အပိုင်းမှာ အဓိက တာဝန်ယူထားပြီး အတင်းအဓမ္မတပ်သားအဖြစ် စုဆောင်းခံထားရတဲ့ ပအိုဝ်းဒေသခံတွေကိုတော့ ရက်တိုသင်တန်းပေးပြီး မြေပြင်ထိုးစစ် ဆင်ခိုင်းတာလို့ PNLO ရဲ့ ပြောရေးဆိုခွင့်ရှိသူ ခွန်ရိန်းယံက ရွှေဖီမြေကို ပြောပါတယ်။
“ကျနော်တို့ မြေပြင်မှာ တွေ့နေရတဲ့ အနေအထားကတော့ မြေပြင်ထိုးစစ်မှာ ရက်တိုသင်တန်းပေးပြီး အလှည့်ကျခေါ်တဲ့ ပအိုဝ်းရွာသားတွေကို ကျနော်တို့ တွေ့နေရတာကတော့ စိတ်ကြွဆေးပုံစံမျိုး တိုက်ကျွေးပြီးတော့မှ အတင်းအကျပ် တိုက်ခိုင်းတဲ့ ပုံစံမျိုးကို တွေ့နေရတယ်။ အဲဒါကြောင့်လည်း မြေပြင်မှာ အသေအပျောက်တွေ အကျအဆုံးတွေ များနေတာ တွေ့ရပါတယ်”
တိုက်ပွဲအတွင်း စစ်တပ်နဲ့ PNO ဘက်က ၁၃၀ ဦးထက်မနည်း သေဆုံးခဲ့ပြီး ဒေသခံ ထိခိုက်သေဆုံးတာနဲ့ ဒဏ်ရာရတာတွေလည်း ရှိပေမဲ့ အချက်အလက် အတိအကျကိုတော့ မသိရသေးဘူးလို့ ဆိုပါတယ်။
လက်ရှိအချိန်မှာ ပအိုဝ်းလူမျိုးအချင်းချင်းတိုက်ခိုက်နေရမယ့်အချိန် မဟုတ်ဘဲ ပအိုဝ်းလူထုတွေအနေနဲ့ မိမိတို့ရဲ့ အခြေအနေအမှန်ကို သိရှိပြီး အထူးသတိထားဖို့ လိုအပ်တယ်လို့ ခွန်ရိန်းယံက ဆက်ပြောပါတယ်။
“သူတို့ခိုင်းတဲ့အတိုင်း မလုပ်ဘူးဆိုရင် ရွာသားတွေကို ပစ်သတ်တာတို့ အဲဒါမျိုးလည်း ကျနော်တို့ သတင်းတွေ ကြားနေရပါတယ်။ အဲဒါကြောင့် အခုဆို ပအိုဝ်းလူထုတွေဟာ စစ်ကောင်စီနဲ့ ပြည်သူ့စစ် PNO ရဲ့ အသုံးချမှုကို အလူးအလဲ ခံနေရတဲ့ အနေအထားမှာ ရှိနေတာပေါ့လေ။ သူတို့ တိုက်ပွဲမှာ တက်ခိုင်းပြီဆိုရင်လည်း နောက်ပြန်ဆုတ်တဲ့လူကို သူ့တို့အနောက်ကနေ ပြန်ပြီးတော့မှ ပစ်တာတို့ ကျနော်တို့ သတင်းတွေ ကြားနေရတယ်။ အဲဒါကြောင့်လည်း ကျနော်တို့ ပအိုဝ်းလူထုတွေအနေနဲ့ အခုချိန်မှာ အထူးသတိထားဆင်ခြင်ဖို့ လိုတယ်။ ကိုယ့်ရဲ့ အခြေအနေအမှန်ကို သိရှိကြဖို့ အထူးလိုအပ်တဲ့အချိန်အခါ ဖြစ်တယ်ပေါ့လေ”
ဒါ့အပြင် ဒီနေ့ ဇန်နဝါရီ ၁၈ ရက် မနက်မှာလည်း လွယ်ချယ်ရွာကို စစ်တပ်က ဂျက်ဖိုက်တာနဲ့ ဗုံးလေးလုံး ကြဲချတိုက်ခိုက်ခဲ့တယ်လို့ ထုတ်ပြန်ချက်ထဲ ဖော်ပြထားပါတယ်။
စစ်တပ်နဲ့ PNO ဘက်က လက်နက်ကြီး၊ ဒရုန်း၊ တိုက်လေယာဥ်နဲ့ ပအိုဝ်းကျေးရွာတွေကို တိုက်ခိုက်နေတာကြောင့် ဆီဆိုင်မြို့နယ် အရှေ့ဘက်ခြမ်းက ဒေသခံ ထောင်နဲ့ချီ ထွက်ပြေးတိမ်းရှောင်နေရတယ်လို့ ဆိုပါတယ်။
