ခိုင်လေး၊ ဇန်နဝါရီ ၁၁ ရက်၊ တောင်ကြီး
ရှမ်းတောင် တောင်ကြီးကနေ ရှမ်းမြောက် လားရှိုးဘက် လာမယ့်သူတွေထဲက ၁၃ မျဉ်းစောင်း မဟုတ်တဲ့ တခြားဒေသက လူထုတွေဟာ စစ်တပ်က ဖမ်းဆီးမှာကို စိုးရိမ်တာကြောင့် ကွင်းလမ်းကနေ ပတ်သွားရလို့ ကားခ ပိုပေးနေကြရပါတယ်။
ကွင်းလမ်းကနေ ပတ်ပြီး သွားရတဲ့ ဒေသခံတွေဟာ ကားခ တစ်ယောက်ကို ကျပ် ၅ သိန်း ပေးရပြီးတော့ ၁၃/ ကိုင်ဆောင်တဲ့ ဒေသခံတွေကတော့ လမ်းမကြီးအတိုင်း သွားလာလို့ ရတဲ့အတွက် ကားခက ၁ သိန်း ၇ သောင်းကနေ ၂ သိန်းဝန်းကျင်အထိ ပေးရတယ်လို့ ကားသမားတစ်ဦးက ပြောပါတယ်။
အမျိုးသမီး ခရီးသည်တစ်ဦးက “အရင်က ကားစီးရင် ကားခက ထောင်ဂဏန်းလောက်ဘဲ ရှိတယ်။ အခုဟာက သောင်းဂဏန်းတောင် မရဘူး။ သိန်းဂဏန်း ပေးပြီး သွားနေရတယ်။ ကုန်ဈေးနှုန်းတွေလည်း မနည်းဘူးလေ” ဆိုပြီး ပြောပါတယ်။
၁၃ မျဉ်းစောင်း ကိုင်ဆောင်တဲ့ ခရီးသည်တွေကတော့ ထောက်ခံစာနဲ့အတူ ပုံမှန် လမ်းမကြီးအတိုင်း သွားလာလို့ရကြောင်း အထက်ပါ ကားသမားက ပြောပါတယ်။
၁၁ မျဉ်းစောင်း၊ ၅ မျဉ်းစောင်း၊ ၁ မျဉ်းစောင်း ကိုင်ဆောင်ထားတဲ့ ခရီးသည်တွေဟာ ကွင်းလမ်းကနေတဆင့် ပို့ဆောင်ပေးရတာဖြစ်ပြီး ၎င်းတို့ကိုတော့ ထောက်ခံစာ ပြုလုပ်ပေးတာ မရှိဘူးလို့ ဆိုပါတယ်။
“၁၃/ တွေကြတော့ ထောက်ခံစာပါရင် ဂိတ်တွေက ပေးဖြတ်တယ်။ ထောက်ခံစာကိုတော့ ရဲစခန်းနဲ့ အေးသာယာ ကားကွင်းမှာ လုပ်လို့ရတယ်။ လားရှိုးကနေ လာရင်တော့ မလိုဘူး။ ၁၁/၊ ၅/၊ ၁/တို့ကြတော့ စစ်တပ်ဘက်က ဖမ်းထားမှာဆိုးလို့ ကွင်းလမ်းကနေ ပတ်ပြီး သွားရတယ်”
၁၀၂၇ စစ်ဆင်ရေး ဖော်ဆောင်ပြီးနောက် ရှမ်းမြောက်ရှိ မြို့အများစုကို ညီနောင်မဟာမိတ် ၃ ဖွဲ့နဲ့ ပူးပေါင်းတပ်ဖွဲ့ တိုက်ခိုက်သိမ်းပိုက်ပြီးနောက် စက်သုံးဆီဈေးနှုန်း အဆမတန် မြှင့်တက်လာသလို ကားခလည်း ၅ ဆကနေ ၁ဝ ဆအထိ မြှင့်တက်လာပါတယ်။
