ယာရူစိင်၊ ဧပြီ ၂ ရက်၊ ကျောက်ဆည်
မန္တလေးတိုင်း ကျောက်ဆည်မြို့ အေးမြကြည်လင်ရပ်ကွက်မှာရှိတဲ့ Bright Kids မူကြိုကျောင်းမှာ တက်နေကြတဲ့ ကလေး ၂၅ ဦးအပါအဝင် သေဆုံးသွားသူ ၂၇ ဦးအတွက် ကျန်ရစ်သူ မိသားစုဝင်တွေက အမျှဝေ အမိန့်စာပြန်တာတွေ ပြုလုပ်ပေးခဲ့ပါတယ်။
“ဒီနေ့မနက်ပိုင်းမှာ အမိန့်စာပြန်တာ ပြုလုပ်ပေးတာပါ။ အဲကျောင်း တည်ထောင်သူနဲ့ ကျန်ရစ်တဲ့ မိသားစုတွေက ပူးပေါင်းပြီး သေဆုံးသွားသူတွေကို ရည်စူးပြီး ပြုလုပ်ပေးတာပါ။ ဒီလို ငလျင်မျိုးကို တစ်ခါမှ မကြုံဖူးပါဘူး။ မိသားစုဝင်တွေအတွက် တစ်ကယ်စိတ်မကောင်း ဖြစ်ပါတယ်။ ကလေးတွေ ဘယ်လောက်တောင် လန့်နေမလဲ မသိဘူး။ တွေးမိတိုင်း မျက်ရည် ကျရပါတယ်” လို့ ကျောက်ဆည်မြို့ခံတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ မတ်လ ၂၈ ရက်က ပြင်းအား ၇.၇ ရှိတဲ့ ငလျင် လှုပ်ခတ်တာကြောင့် ကလေးငယ် ၂၅ ဦး၊ ဆရာမ ၁ ဦးနဲ့ ကျောင်းမုန့်ဈေးတန်းက အမျိုးသမီး ၁ ဦး သေဆုံးခဲ့တာပါ။
မတ်လ ၂၈ ရက် နေ့လယ် ၁ နာရီဝန်းကျင်မှာ မန္တလေးမြို့အရှေ့မြောက်ဘက် ၁၂ မိုင်အကွာကို ဗဟိုပြုပြီး လှုပ်ခတ်ခဲ့တဲ့ ငလျင်ကြောင့် မန္တလေးတိုင်းမှာ ထိခိုက်သေဆုံးမှုများပြီး နေပြည်တော်၊ စစ်ကိုင်းတိုင်းနဲ့ ရှမ်းတောင်လည်း ထိခိုက်သေဆုံးမှု များခဲ့ပြီးတော့ သေဆုံးမှုတွေ ဆက်လက် မြှင့်တက်နေပါတယ်။
မန္တလေးတိုင်းမှာ ထိခိုက်သေဆုံးမှု အများဆုံးဖြစ်ပြီး ဒီနေ့ ဧပြီ ၂ ရက် နေ့လယ်အထိ ငလျင်ဒဏ်ကြောင့် နိုင်ငံတစ်ဝန်းမှာ ထိခိုက်သေဆုံးသူရဲ့ အလောင်း ၃ ထောင်နီးပါး တွေ့ရှိထားပြီး ဆက်လက် ရှာဖွေနေဆဲ ဖြစ်ပါတယ်။
