အိုက်ပွီး၊ မေလ ၄ ရက်၊ ဟားခါး
ချင်းပြည်နယ်မှာ စစ်ကောင်စီ ထိန်းချုပ်ထားတဲ့မြို့အပါအဝင် ချင်းပြည်နယ်တစ်ခုလုံး လျှပ်စစ်မီးနဲ့ ဆက်သွယ်ရေး ဖုန်းလိုင်း၊ အင်တာနက်လိုင်း ပြတ်တောက်နေတယ်လို့ ဒေသခံတွေက ရွှေဖီမြေသို့ ပြောပါတယ်။
အစောပိုင်းက လျှပ်စစ်မီးနဲ့ ဆက်သွယ်ရေး ဖုန်းလိုင်း၊ အင်တာနက်လိုင်း ရရှိတဲ့ ဟားခါးမြို့အပါအဝင် ပြီးခဲ့တဲ့ မတ်လ ၂၃ ရက်ကစပြီး ချင်းပြည်တစ်ခုလုံး ပြတ်တောက်နေတာပဲ ဖြစ်ပါတယ်။
“လျှပ်စစ်မီး ပျက်တာက အတော်ကြာပါပြီ။ ပျက်တည်းက အခုထိ မရသေးဘူး။ ဖုန်းလိုင်းကြတော့လည်း အရင်လက လုံးဝ မရဘူး။ အခုတော့ ပေါ်လာလိုက်၊ ပျောက်လိုက်နဲ့ ဖြစ်နေတယ်။ ဖုန်းလိုင်း ပေါ်ပေမဲ့ အင်တာနက် သုံးမရဘူး။ ဖုန်းခေါ်မရဘူး” လို့ ဟားခါးမြို့ခံတစ်ဦးက ရွှေဖီမြေသို့ ပြောပါတယ်။
ဟားခါးမြို့ကလွှဲရင် ကျန်တဲ့မြို့တွေဟာ ပြီးခဲ့တဲ့ ၂၀၂၄ ခုနှစ်ကတည်းက လျှပ်စစ်မီးနဲ့ ဆက်သွယ်ရေး ဖုန်းလိုင်း၊ အင်တာနက်လိုင်း ပြတ်တောက်နေတာပဲ ဖြစ်ပါတယ်။
လျှပ်စစ်မီးနဲ့ ဖုန်းလိုင်း၊ အင်တာနက်လိုင်း မရရှိပေမဲ့ စစ်ကောင်စီအုပ်ချုပ်ရေးယန္တရား လှည့်ပတ်နေဆဲဖြစ်တဲ့ ဟားခါးနဲ့တီးတိန်မြို့မှာတော့ ဌာနဆိုင်ရာဝန်ထမ်းတွေကို မီးစက်နဲ့ ဝိုင်ဖိုင် သုံးစွဲခွင့် ရနေတယ်လို့ သိရပါတယ်။
“တီးတိန်မှာတော့ ဌာနဆိုင်ရာ ရုံးဝန်ထမ်းတွေအတွက် မီးစက်နိုးပြီး အလုပ် လုပ်ခိုင်းနေပါတယ်။ ပြီးတော့ အင်တာနက်လိုင်းကိုလည်း ဝိုင်ဖိုင်စက် တပ်ဆင်ပေးပြီးတော့ အလုပ်ချိန်အတွင်း အကန့်အသတ် အင်တာနက်လိုင်း အခမဲ့ သုံးစွဲခွင့် ရကြပါတယ်” လို့ တီးတိန်မြို့ခံတစ်ဦးက ရွှေဖီမြေသို့ ပြောပါတယ်။
ချင်းပြည်နယ်မှာ ဆက်သွယ်ရေး ဖုန်းလိုင်းနဲ့ အင်တာနက်လိုင်း ပြတ်တောက်နေပြီး ပြည်မနဲ့ဆက်စပ်တဲ့ နေရာတချို့မှာ ဖုန်းလိုင်း ရရှိပြီး အင်တာနက်လိုင်းအတွက် ဒေသခံတွေဟာ စတားလင့်ခ်ကို ပိုအသုံးပြုလာကြပါတယ်။
