ပျားကြီး၊ ဧပြီ ၂၄ ရက်၊ မန္တလေး
ရာသီဥတု ပူပြင်းလာမှုကြောင့် ငလျင်ဒဏ် ခံစားနေရတဲ့ မန္တလေးဒေသခံတွေဟာ အခက်တွေ့နေတယ်လို့ ဒေသခံတွေက ပြောပါတယ်။
သင်္ကြန်ကာလနောက်ပိုင်းကစပြီး မန္တလေးမြို့မှာ နေ့အပူချိန် သိသိသာသာ မြင့်တက်ခဲ့တဲ့အတွက် လမ်းမပေါ်နဲ့ ကွင်းပြင်တွေထဲ ယာယီနေထိုင်နေရတဲ့ သောင်းနဲ့ချီတဲ့ ငလျင်ဘေးသင့်သူတွေဟာ အပူဒဏ်ကြောင့် ဒုက္ခရောက်နေရတာ ဖြစ်ပါတယ်။
မဟာအောင်မြေမြို့နယ်မှ ငလျင်ဘေးသင့်သူတွေကို ကူညီပေးနေတဲ့ ဒေသခံတစ်ဦးက “မိုးကာတဲတွေ၊ ရွက်ဖျင်တဲတွေအောက်မှာ နေလို့မရတော့ဘူး။ အရမ်းပူတယ်။ သစ်ပင်တွေမရှိတဲ့ မြို့လယ်ခေါင်ကလူတွေက အခြေအနေ ပိုဆိုးတယ်။ ကြာလာရင် ကျန်းမာရေးပါ ထိခိုက်တော့မယ်” လို့ ပြောပါတယ်။
လက်ရှိ မန္တလေးမြို့ရဲ့ နေ့အပူချိန်ဟာ ၄၀ ဒီဂရီစင်တီဂရိတ်အထိ ရှိနေပြီး ညပိုင်းမှာ ၃၀ ဒီဂရီစင်တီဂရိတ်အထိ ရှိနေတာပဲ ဖြစ်ပါတယ်။
မြို့ပေါ်ရပ်ကွက်တွေက နေအိမ်ပြိုကျပျက်စီးမှုကြောင့် စာသင်ကျောင်း၊ ဘုန်းတော်ကြီးကျောင်း၊ မင်္ဂလာဈေးဟောင်းလို ကွင်းပြင်နဲ့ လမ်းမတွေပေါ် ယာယီ မိုးကာတဲနဲ့ ဖြစ်သလို နေထိုင်နေရတာကြောင့် ကလေးသူငယ်နဲ့သက်ကြီးရွယ်အိုတွေဟာ အပူဒဏ်ကို အလူးအလဲ ခံစားနေရတာ တွေ့ရပါတယ်။
အခုလို အပူဒဏ်ကြောင့် အခက်အခဲ ရှိနေချိန် စာသင်ကျောင်းမှာ ယာယီ နေထိုင်သူတွေကို ဧပြီ ၃၀ ရက် နောက်ဆုံးထားပြီး ဖယ်ရှားဖို့ စစ်ကောင်စီ လက်အောက်ခံ ပညာရေးဝန်ကြီးဌာနက ညွှန်ကြားထားတာကြောင့် နေထိုင်ရေးအတွက် ပိုမိုဆိုရွားလာနိုင်တယ်လို့ ဒေသခံတွေက ပြောဆိုပါတယ်။
“ကျနော်တို့က ကျောင်းဘောလုံးကွင်းထဲမှာ နေရတာပေါ့။ အခုကျ ကျောင်းတွေ ပြန်ဖွင့်မှာမို့လို့ ဒီလကုန် နောက်ဆုံးထား ဖယ်ရမယ်လို့ပြောထားတယ်။ အဲဒါဆို ဘယ်နေရာ ရွှေ့ပေးရအုံးမလဲ မသိသေးဘူး။ ပိုပြီးဒုက္ခရောက်မှာတော့ သေချာတယ်” လို့ အောင်မြေသာစံမြို့နယ်မှ ငလျင်ဘေးသင့်သူတစ်ဦးက ပြောပါတယ်။
လက်ရှိအချိန်မှာ အပူဒဏ်ကြောင့် ကျန်းမာရေး ဆိုးဆိုးရွားရွား ထိခိုက်မှု မရှိသေးပေမဲ့ သောက်သုံးရေ ရရှိမှု အခက်အခဲကြောင့် လာမယ့် ရက်သတ္တပတ်အတွင်း အခြေအနေ ပိုမိုဆိုးရွားလာနိုင်တယ်လို့ ဒေသခံတွေက ပြောဆိုနေကြပါတယ်။
