ပျားကြီး၊ ဧပြီ ၂၇၊ မင်းကွန်း
စစ်ကိုင်းမြို့နယ်၊ မင်းကွန်းဒေသကို စစ်ကောင်စီကချုပ်ကိုင်ပိတ်ဆို့ထားတာကြောင့် ငလျင်ဘေးကူညီကယ်ဆယ်ပေးမှုတွေဟာ ၁လကြာတဲ့အထိ လုံးဝမရောက်ရှိသေးဘူးလို့ ဒေသခံတွေကဆိုပါတယ်။
မတ်လ ၂၈ ရက်ကလှုပ်ခတ်ခဲ့တဲ့ စစ်ကိုင်းငလျင်ဒဏ်ကြောင့် မင်းကွန်းဒေသတစ်ခုလုံးမှာအဆောက်အဦးပြိုကျပျက်စီးမှုတွေနဲ့ လူသေဆုံးမှုတွေအများအပြားရှိခဲ့ပေမဲ့ စစ်ကောင်စီက ကူညီကယ်ဆယ်ရေးလုပ်ငန်းတွေသွားရောက်လုပ်ဆောင်ခွင့် ကန့်သတ်ခဲ့တာဖြစ်ပါတယ်။
“စစ်ကိုင်းနဲ့ မင်းကွန်းကြားကရွာတွေတော့ အကူအညီနည်းနည်းပါးပါးရောက်တယ်။ မြသိန်းတန်ဘုရားမြောက်ဖက်ကစပြီး တလျောက်လုံးကဒီနေ့အထိ လုံးဝမရောက်သေးဘူး။တချို့တွေဆိုစားစရာကိုမ ရှိတော့ဘူး။ နေစရာလည်းမရှိတော့ဘူး”လို့ ဒေသခံအမျိုးသမီးတစ်ဦးကပြောပါတယ်။
အခုလို ငလျင်ဘေးအကူအညီပေးမှုတွေ မရောက်ရှိသေးတာကြောင့် ရှားယောင်း၊ ကင်း၊ ချောင်းမကြီး၊ အုန်းသဇင်၊ မြေတိုင်း စတဲ့ကျေးရွာတွေအပါအဝင်ကျေးရွာပေါင်း ၇ ရွာထက်မနည်းကဒေသခံတွေဟာ စားဝတ်နေရေးခက်ခဲမှုတွေနဲ့ ဆိုးဆိုးရွားရွားရင်ဆိုင်နေရတယ်လို့ အသက် ၄၉ နှစ်အရွယ်ဒေသခံအမျိုးသားတစ်ဦးက ဆိုပါတယ်။
မင်းကွန်းဒေသကိုဆက်သွယ်သွားလာဖို့ ကားလမ်းနဲ့ ရေကြောင်းလမ်း ၂ ခုရှိပေမဲ့ လမ်းတွေအားလုံးကို စစ်ကောင်စီကတင်းတင်းကြပ်ကြပ်ပိတ်ဆို့ထားတာတွေ့ရပါတယ်။
“စစ်ကိုင်းဖက်က ကားနဲ့သွားရင်ရတယ်။ ဒါပေမဲ့ လူအိုရုံကိုကျော်ခွင့်မပေးဘူး။ မန္တလေးကနေ ရေကြောင်းကသွားပြန်ရင်လည်း ဆိပ်ကမ်းတွေမှာကတည်းကသွားခွင့်မပေးဘူး။ မြစ်ထဲကဂိတ်တွေကလည်းပေးမသွားဘူး။ အဲ့ဒါကြောင့်အကူအညီတွေလုံးဝ မရောက်တာပေါ့။ နောက်ပြီး နေ့တိုင်းလိုလို လက်နက်ကြီးနဲ့ပစ်လိုက်၊ လေကြောင်းကနေပစ်လိုက်ဆိုတော့ တော်ရုံအလှူရှင်တွေလည်းမသွားရဲကြဘူး”လို့ မန္တလေးအခြေစိုက်ပရဟိတအသင်းဦးဆောင်သူတစ်ဦးကပြောပါတယ်။
အဲ့ဒီအပြင် ကျွန်းတွေပေါ်မှာငလျင်ကြောင့် မြေပြင်အက်ကွဲမှုတွေအများအပြားရှိခဲ့တဲ့အတွက် ဧက ရာနဲ့ချီတဲ့ ပဲစင်းငုံစိုက်ခင်းတွေအပါအဝင်စိုက်ပျိုးရေးလုပ်ငန်းတွေအားလုံးနီးပါးလည်းပျက်စီးဆုံးရှုံးမှုတွေရှိခဲ့တယ်လို့ ဒေသခံတွေကဆိုပါတယ်။
