ရွှေဖီမြေ၊ ဧပြီ ၅ ရက်
ပြီးခဲ့တဲ့ မတ်လ ၂၈ ရက် နေ့လယ် ၁ နာရီ ဝန်းကျင်က မန္တလေးမြို့ကို ဗဟိုပြုပြီး ပြင်းအား ၇ ဒသမ ၇ အဆင့် ငလျင် လှုပ်ခတ်မှုကြောင့် အိုးဘိုအကျဥ်းထောင်က အနည်းဆုံး လူ ၁၂ ဦး သေဆုံးခဲ့ပြီး အဲဒီအထဲမှာ နိုင်ငံရေး အကျဥ်းသူ ၆ ဦး ပါဝင်တယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်- PPNM က ဒီနေ့ ဧပြီ ၅ ရက်မှာ ထုတ်ပြန်ထားပါတယ်။
ငလျင် လှုပ်ခတ်ချိန် အိုးဘိုထောင်က အမျိုးသမီးအဆောင်(၁)နဲ့ အဆောင်(၂) ပြိုကျခဲ့တာကြောင့် အကျဥ်းချခံထားရတဲ့ နိုင်ငံရေးအကျဥ်းသူတွေဖြစ်တဲ့ မမိုးသူဇာခိုင်၊ ဒေါ်လဲ့လဲ့စိုး၊ ဒေါ်ခင်အုန်းရွှေ၊ မကေကေဝင်း၊ မပပဝင်းနဲ့ မဖူးဝေဝေတို့ သေဆုံးခဲ့တယ်လို့ ဆိုပါတယ်။
ဒါ့အပြင် ငလျင်ကြောင့် အကျဥ်းထောင်ထဲက ထိခိုက်ဒဏ်ရာရသူ ၄၀ ဦးကျော်ရှိပြီး အဲဒီအထဲက ၉ ဦးဟာ စိုးရိမ်ရတယ်လို့ ဆိုပါတယ်။
ထိခိုက်ဒဏ်ရာရသူတချို့ဟာ အကျဉ်းထောင်ထဲ ကုသဖို့ မဖြစ်နိုင်ဘဲ ပြင်ပဆေးရုံကို ပို့ဆောင်ဖို့ လိုအပ်ပေမဲ့ စစ်ကောင်စီဘက်က ကုသခွင့် မပြုတာတွေ ရှိနေတယ်လို့လည်း PPNM က မနေ့ ဧပြီ ၄ ရက်မှာ ထုတ်ပြန်ထားပါတယ်။
ပြီးခဲ့တဲ့ မတ်လ ၂၈ ရက်က လှုပ်ခတ်တဲ့ ငလျင်ဒဏ်ကြောင့် ဧပြီ ၄ ရက် ည ၈ နာရီအထိ DVB သတင်းဌာနက ကောက်ယူစုဆောင်းထားတဲ့စာရင်းအရ စုစုပေါင်း သေဆုံးသူ ၄,၁၅၉ ဦးနဲ့ ဒဏ်ရာရသူ ၆,၁၆၈ ဦး ရှိလာပြီလို့ DVB က ဖော်ပြထားပါတယ်။
