ပျားကြီး၊ မေလ ၄ ရက်၊ မန္တလေး
မိုးရွာသွန်းမှုကြောင့် မန္တလေး အောင်မြေသာစံမြို့နယ်က ငလျင်ဒဏ်သင့် ၈ ထပ် အဆောက်အဦးတစ်ခု အောက်ဆုံးထပ် မြေကျွံကျမှု ဖြစ်ပွားခဲ့တယ်လို့ ဒေသခံတွေက ပြောပါတယ်။
ဒီနေ့ မေလ ၄ ရက် မနက်အစောပိုင်းက မိုးရွာသွန်းမှုကြောင့် ၁၅ လမ်း၊ ၈၂ လမ်းနဲ့ ၈၆ လမ်းကြားမှာရှိတဲ့ ၈ ထပ် လူနေအဆောက်အဦးဟာ ညနေ ၄ နာရီခွဲဝန်းကျင်က ကျွံကျမှု ဖြစ်ပွားခဲ့တာပဲ ဖြစ်ပါတယ်။
“ဝုန်းဆိုတဲ့အသံနဲ့ လှုပ်သွားတော့ ငလျင်ထပ်လှုပ်တာဆိုပြီး အပြင်ကို ထွက်ပြေးတာ။ အိမ်အပြင်ရောက်မှ အဲဒီအဆောက်အဦး ပြိုကျမှန်း သိတာ။ အဲဒီအဆောက်အဦးက စဖြစ်တုန်းက အနောက်ဖက်ကို စောင်းနေတာ၊ အခုကျ အရှေ့ဖက်ကို ပြန်စောင်းသွားတယ်” လို့ အနီးအနားမှာ နေထိုင်သူတစ်ဦးက ပြောပါတယ်။
၈ ထပ် တိုက်ခန်းအဆောက်အဦးဟာ မတ်လ ၂၈ ရက်က လှုပ်ခတ်ခဲ့တဲ့ ငလျင်ကြောင့် လူနေထိုင်လို့ မရတော့တဲ့အထိ ပျက်စီးခဲ့တာကြောင့် တိုက်ခန်းမှာ နေထိုင်သူ အိမ်ထောင်စု ၂၀ ကျော်ဟာ ဘေးလွတ်ရာ ရွှေ့ပြောင်းနေထိုင်ရပြီး အဆောက်အဦးပိုင်ရှင်ကလည်း လက်ရှိအချိန်ထိ ပြင်ဦးလွင်မြို့မှာ သွားရောက် နေထိုင်တယ်လို့ ဒေသခံတွေက ပြောဆိုပါတယ်။
အဆောက်အဦး ကျွံကျမှုကြောင့် လူထိခိုက်မှု မရှိပေမဲ့ ထပ်မံ ပြိုကျမယ့် အခြေအနေ ရှိနေတာကြောင့် အနီးအနားမှာ ရှိနေတဲ့ ဒေသခံတွေ စိုးရိမ်မှုရှိပြီး ဘေးလွတ်ရာ ရွှေ့ပြောင်းနေထိုင်ဖို့ ပြင်ဆင်နေကြတာကို တွေ့ရပါတယ်။
ဧပြီ ၁၅ ရက်ကလည်း မိုးရွာသွန်းမှုကြောင့် ငလျင်ဒဏ်သင့် အဆောက်အဦး ၂ ခု ပြိုကျမှုတစ်ခု ဖြစ်ပွားခဲ့ပါသေးတယ်။
