ပို့လဘား၊ မတ်လ ၁၄ ရက်၊ တန့်ယန်း
ရှမ်းမြောက် တန့်ယန်းမြို့မှာ ကားနဲ့ဆိုင်ကယ် ယာဉ်တိုက်မှုဖြစ်လို့ ကလေးငယ် ၂ ဦး သေဆုံးပြီး တစ်ဦးက ထိခိုကိဒဏ်ရာ ရရှိခဲ့တယ်လို့ စုံစမ်းသိရှိရပါတယ်။
ဒီနေ့ မတ်လ ၁၄ ရက် မနက် ၉ နာရီခန့်က တန့်ယန်းမြို့ ရပ်ကွက် ၆ မှာရှိတဲ့ မိုးဆန်းပန်း ပန့်ဆီဆိုင်အနီးမှာ ကားနဲ့ဆိုင်ကယ်တစ်စီး ယာဉ်တိုက်မှု ဖြစ်တာကြောင့် ဆိုင်ကယ် မောင်းလာတဲ့ သားအမိသုံးဦးထဲမှ အသက် ၁၀ နှစ်နဲ့ ၅ နှစ်အရွယ် ကလေးငယ် ၂ ဦး သေဆုံးပြီး မိခင်က ဒဏ်ရာ ရရှိခဲ့တယ်လို့ တန့်ယန်းမြို့ အရန်မီးသတ်တပ်ဖွဲ့မှ တာဝန်ရှိသူတစ်ဦးက ရွှေဖီမြေကို ပြောပါတယ်။
“သားအမိသုံးယောက်က ပွဲကနေ ပြန်လာတာပေါ့နော်။ သူတို့အိမ်တောင် ရောက်နေပြီ။ ထီး မေ့ကျန်ခဲ့လို့ဆိုပြီး ပြန်သွားယူလိုက်တာ။ သူက အရမ်းအမြန်မောင်းလာတာ။ အဲဒီပန့်ဆီဆိုင်ရှေ့အရောက်မှာ သူအရှိန်မထိန်းနိုင်ဘဲ အဲဒီသားအမိတွေ တိုက်တာပေါ့နော်။ သူတို့အမေက ခြေထောက် ကျိုးသွားတယ်။ တစ်ယောက်က အဲမှာဘဲ ပွဲချင်းသေသွားတယ်။ တစ်ယောက်ကတော့ ဆေးရုံမှာ သေတယ်”
ယာဉ်တိုက်မှုကြောင့် ထိခိုက်ဒဏ်ရာရတဲ့ မိခင်ဖြစ်သူဟာ တန့်ယန်းမြို့ ပြည်သူ့ဆေးရုံသို့ ပို့ဆောင်ပေးခဲ့တယ်လို့ ဆိုပါတယ်။
လူထုတွေအနေနဲ့ ယာဉ်စည်းကမ်း၊ လမ်းစည်းကမ်းကို စနစ်တကျ လိုက်နာပေးဖို့ တန့်ယန်းမြို့ အရန်မီးသတ်တပ်ဖွဲ့က တိုက်တွန်းထားပါတယ်။
