အိုက်ပွီး၊ ဖေဖော်ဝါရီ ၄ ရက်၊ မတူပီ
ချင်းပြည်နယ် မတူပီမြို့နယ် ရွာမန်းကျေးရွာမှာ နယ်မြေအငြင်းပွားမှုကြောင့် ချင်းလက်နက်ကိုင်နှစ်ဖွဲ့ဖြစ်တဲ့ မရာလဲန်းကာကွယ်ရေးတပ်- MDF နဲ့ ချင်းကာကွယ်ရေးတပ် (လောက်တူ)တို့ ပစ်ခတ်မှု ဖြစ်ပွားပြီး နှစ်ဘက် အကျအဆုံး ရှိတယ်လို့ စုံစမ်းသိရှိရပါတယ်။
ရွာမန်းရွာမှာ တပ်စွဲထားတဲ့ CDF-Lautu တပ်စခန်းကို MDF က ပြီးခဲ့တဲ့ ဇန်နဝါရီ ၁၈ ရက်ကစလို့ မဟာမိတ်နဲ့အတူ အင်အား အလုံးရင်းနဲ့ ထိုးစစ်ဆင်ခဲ့ပြီး ဒရုန်း၊ လက်နက်ကြီးကျည်နဲ့ ဗုံးကြဲ တိုက်ခိုက်ခဲ့တယ်လို့ သိရပါတယ်။
ရွာမန်းရွာဟာ CDF-Lautu ထိန်းချုပ်နယ်မြေထဲက လောက်တူ (ချင်း)လူမျိုး နေထိုင်ကြတဲ့ ကျေးရွာဖြစ်ပေမဲ့ အဲဒီရွာဟာ မရာ (ချင်း)လူမျိုးရဲ့နယ်မြေ ဖြစ်တဲ့အတွက် MDF က အခုလို အင်အားအလုံးရင်းနဲ့ ထိုးစစ်ဆင် တိုက်ခိုက်ခဲ့တာလို့ ဆိုပါတယ်။
“အခုဖြစ်တဲ့ ပြဿနာဟာ နယ်မြေကိစ္စကြောင့် ဖြစ်တာပါ။ ဘယ်သူ မှန်လဲ မှားလဲဆိုတာ ပြောဖို့ခက်ပေမဲ့ လက်နက်နဲ့ ဖြေရှင်းတာက မဖြစ်သင့်ဘူးပေါ့နော်။ ရွာမန်းရွာဟာ လောက်တူ(ချင်း)တွေ နေထိုင်တဲ့နေရာ ဖြစ်တယ်။ CDF-Lautu ထိန်းချုပ်နယ်မြေလည်း ဖြစ်တယ်။ ပြီးတော့ သူတို့နယ်မြေပေါ့။ တစ်ဖက်မှာလည်း MDF က မရာ(ချင်း) လူမျိုးတွေနယ်မြေ။ သူတို့နယ်မြေမှာ CDF-Lautu စခန်းချတာ မကြိုက်ဘူးပေါ့။ သူတို့နယ်မြေမှာ သူတို့ပဲ နေမယ်။ သူတို့ပဲထိန်းချုပ်မယ် စတဲ့ကိစ္စတွေကြောင့်ဖြစ်တဲ့ပြဿနာတွေပါ။ ပိုဆိုးတာက ပြဿနာကို လက်နက်နဲ့ ဖြေရှင်းကြတာပေါ့” လို့ ချင်းနိုင်ငံရေးသမားတစ်ဦးက ရွှေဖီမြေသို့ ပြောပါတယ်။
ရွာမန်းရွာမှာ နှစ်ဖက်ဖြစ်ပွားတဲ့ တိုက်ပွဲအတွင်း MDF ရဲ့ ဒရုန်းနဲ့ လက်နက်ကြီးကျည် တိုက်ခိုက်မှုကြောင့် ရွာမန်းရွာက ဘုရားကျောင်း၊ စာသင်ကျောင်းနဲ့ နေအိမ်အများစု ထိခိုက်ပျက်စီးသွားသလို ရွာမန်းရွာအပါအဝင် အနီးအနားမှ ကျေးရွာ ၄ ရွာခန့်က လူထုတွေ ဘေးလွတ်ရာ ထွက်ပြေးတိမ်းရှောင်နေကြရပါတယ်။
ဒါ့အပြင် တိုက်ပွဲအတွင်း MDF နဲ့ CDF-Lautu နှစ်ဖက် ရဲဘော် ကျဆုံးခဲ့တယ်လို့ သိရပါတယ်။
“ကျနော် နောက်ဆုံး ကြားသိရတာက CDF-Lautu ဘက်က ရဲဘော် ၅ ယောက်ထက်မနည်း ကျတယ်လို့ ကြားတယ်။ MDF ဘက်ကလည်း ကျဆုံးမှုနဲ့ ထိခိုက်မှု များတယ်ကြားပါတယ်။ အချင်းချင်းတွေ အခုလိုဖြစ်တာ တစ်ကယ်လည်း စိတ်မကောင်းဘူး။ ရဲဘော်တွေ မကျသင့်ဘဲ ကျဆုံးနေရတယ်” လို့ MDF, CDF-Lautu တို့နဲ့ နီးစပ်သူတစ်ဦးက ရွှေဖီမြေသို့ ပြောပါတယ်။
MDF ရဲ့ လောက်တူ(ချင်း)နယ်မြေမှာ အကြိမ်ကြိမ် ထိုးစစ်ဆင် တိုက်ခိုက်မှုကြောင့် CDF-Lautu အနေနဲ့ မလွှဲမရှောင်သာလို့ အခုလို ပြန်လည် ပစ်ခတ်ရတာဖြစ်တယ်လို့ CDF-Lautu ရဲ့ တာဝန်ရှိသူတစ်ဦးက ရွှေဖီမြေသို့ ပြောပါတယ်။
“ကျနော်တို့က အချင်းချင်းတွေ ဖြစ်တဲ့အတွက် အတတ်နိုင်ဆုံး လက်နက်နဲ့ ဖြေရှင်းတာကို ရှောင်ခဲ့ပါတယ်။ လက်နက်နဲ့ ဖြေရှင်းတာလည်း လက်မခံသလို ဖြစ်လည်း မဖြစ်သင့်ဘူး။ ဒါပေမဲ့ ကျနော်တို့ဘက်က လုံးဝ ရှောင်လွှဲလို့ မရတဲ့အခြေအနေတစ်ခုမှာ အခုလို ပြန်လည်ပစ်ခတ်ခဲ့တာ ဖြစ်ပါတယ်။ MDF အနေနဲ့ အခုလုပ်ရပ်တွေကို သုံးသပ်ပြီး ရပ်တန်ဖို့ပြောချင်ပါတယ်”
ရွာမန်းရွာမှာ ထိုးစစ်ဆင်တာနဲ့ ပတ်သက်လို့ MDF ကို ရွှေဖီမြေက ဆက်သွယ်ပေမဲ့ ဆက်သွယ်လို့ မရပါဘူး။
MDF ဟာ ချင်းညီနောင်- CB အဖွဲ့ဝင်ဖြစ်ပြီး CDF-Lautu ဟာ ချင်းလဲန်းကောင်စီ- CC အဖွဲ့ဝင် ဖြစ်ပါတယ်။
